Óskemende el Táýelsizdiginiń 30 jyldyǵyna arnap monýment salynbaq
Shyǵys Qazaqstan oblysynyń ákimi Danıal Ahmetovtiń aıtýynsha, monýment oblys kóleminde ǵana emes, respýblıkadaǵy biregeı sáýlet qurylysyna aınalady, dep habarlaıdy Almaty-akshamy.kz.
QazAqparat agenttiniń aqparaty boıynsha, bul týraly oblys ákimi Facebook jelisindegi jeke paraqshasynda jazǵan.
«Búgin Óskemendegi eskertkishter qurylysynyń barysyn baqyladym. Onyń ishinde el Táýelsizdiginiń 30 jyldyǵyna arnalǵan aýqymdy monýment bar. Bul – birtutas memorıaldyq keshen, Qazaq handyǵynyń negizin qalaǵan Jánibek pen Kereı jáne qazaqtyń uly úsh bıi beınelengen biryńǵaı kompozısıa. Sondaı-aq munda el tarıhynyń negizgi kezeńderi men Qazaqstannyń Tuńǵysh Prezıdentiniń dáıeksózderi bar barelefter bolady», - deıdi ol.
Oblys ákiminiń aıtýynsha, monýment oblystaǵy ǵana emes, búkil Qazaqstandaǵy biregeı sáýlet qurylysyna aınalady.
Onyń bıiktigi - 12,6 metrdi quramaq.
«16 jeltoqsanǵa deıin eskertkish salynyp bitedi. Keshenniń jalǵasy elimizdiń birinshi Qorǵanys mınıstri, ardager, Keńes Odaǵynyń Batyry, Halyq Qaharmany - Saǵadat Nurmaǵambetov atyndaǵy aleıa bolmaq. Men qazaqtyń osyndaı nar tulǵaly azamatymen jeke tanys boldym jáne ony qarapaıym, óz isiniń naǵyz sheberi retinde bilemin», - dedi Danıal Ahmetov.