Qazaqstanda qanttyń quny sharyqtap barady. El aımaqtarynda tátti taýardyń kelisi 400-800 teńge aralyǵyn qurap otyr.
Bul shekti kórsetkish emes: kúzge qaraı baǵa tipti 1000 teńgege deıin kóterilýi múmkin deıdi mamandar. Taýar baǵasynyń aıtarlyqtaı kóterilýin shıkizat baǵasynyń qymbattaýy jáne ony jetkizýdegi logıstıkalyq qıyndyqtarmen baılanystyrady, dep habarlaıdy Almaty-akshamy.kz Qazaqtv.com saıtyna silteme jasap.
Qant tóńiregindegi dúrbeleń uzaqqa sozylýy múmkin, deıdi sarapshylar. Mańyzdy ónimniń tapshylyǵyna baılanysty bıyl bar bolǵany 12 myń tonnaǵa jýyq qant qyzylshasy egildi.
"Bul daqyldy óndirýge baılanysty sharýalardyń ózderinde kúrdeli máseleleri bar. Mańyzdy másele sýǵa qatysty, sebebi bul – ylǵal súıgish daqyl. Iaǵnı ony sýarý kerek kezeńde, ádettegideı, bizde sý jetkiliksiz bolady. Biz áli tuqymǵa 90% táýeldimiz. Qant qyzylshasyn óz betinshe irikteý úshin kúrdeli jumystar jasalýy kerek. Sonymen qatar arnaıy tehnologıalardy qamtamasyz etý kerek. Bul ister áli bir jolǵa qoıylǵan joq. Mine, osy salaǵa jaqsy ınvestısıa qajet", - deıdi «Atameken» QR UKP Agroónerkásiptik keshen jáne tamaq ónerkásibi departamentiniń dırektory Erbol Eseneev.
«Atameken» salany damytýdyń aldaǵy bes jylǵa arnalǵan baǵdarlamasyn iske qosýdy usynyp otyr. Bul baǵdarlama basqalarmen qatar elimizde qant qyzylshasy daqyldaryn kóbeıtýdi jáne zaýyttardy tolyq qýatynda júkteýdi kózdeıdi. Ulttyq palatanyń esebine sáıkes, bul úshin Almaty, Jambyl jáne Túrkistan oblystarynyń sharýalaryna shamamen 104 myń gektar jer qajet.