Aqtóbe óńirinde jún óńdep, toqyma emes materıaldar óndiretin zaýyt salý boıynsha ınvestısıalyq joba júzege asyrylýda. Jobanyń bastamashysy — ıtalándyq CORMATEX kompanıasynyń tehnıkalyq qoldaýymen jumys isteıtin «KazFeltec» JSHS.
CORMATEX — toqyma ónerkásibine arnalǵan zamanaýı tehnologıalarǵa mamandanǵan kompanıa.
Zaýytta joǵary sapaly ónim shyǵarýǵa múmkindik beretin Lap FormAir tehnologıasy qoldanylmaq, dep habarlaıdy aqshamnews.kz.
Jobany iske asyrý 2020 jyly bastaldy. Qazirgi ýaqytta qurylys-montaj jumystary júrgizilýde. Jabdyqtardy iske qosý jáne synaqtan ótkizý 2025 jyldyń tamyzyna josparlanǵan.
Kásiporyn jyl saıyn 2000 tonnadan astam shıkizatty óńdeýge qaýqarly bolady. Shıkizat retinde tabıǵı jáne sıntetıkalyq talshyqtar, sondaı-aq toqyma óndirisiniń qaldyqtary paıdalanylatyn bolady. Zaýyt qurylys, mashına jasaý, qaptama jáne súzý júıeleri úshin keńinen qoldanylatyn toqyma emes materıaldardyń alýan túrin shyǵarady. Daıyn ónim ishki naryqqa da, syrtqy naryqqa da jetkiziledi.
Jobanyń negizgi baǵyttarynyń biri — qoı júninen jasalǵan jylý jáne dybys oqshaýlaǵysh taqtalar men rýlondar óndirisi. Bul baǵyt marketıńtik zertteýler nátıjesinde bıznes-josparda basym baǵyt retinde aıqyndaldy.
Joba aıasynda 50-den astam jańa jumys orny ashylady. Sonymen qatar, qazaqstandyq jas mamandardy daıarlaýǵa erekshe kóńil bólinedi — olar zamanaýı, joǵary tehnologıaly jabdyqtarda praktıkalyq tájirıbe jınaqtaıdy.
Joba memlekettik qoldaýmen júzege asyrylýda. Atap aıtqanda, tehnıka men jabdyq satyp alýǵa ketken shyǵynnyń 25%-na deıingi kóleminde ınvestısıalyq sýbsıdıalar qarastyrylǵan.
Jańa óndiris orny óńirdegi qaıta óńdeý ónerkásibiniń damýyna tyń serpin berip, jańa jumys oryndaryn ashýǵa, sondaı-aq buryn paıdalanylmaı kelgen jergilikti shıkizatty — qoı júnin tıimdi ıgerýge múmkindik beredi.