Almatyda Qazaqstannyń, Shvesıanyń, Grýzıanyń, Reseıdiń jáne basqa da jaqyn jáne alys shetelderdiń jetekshi sarapshylarynyń qatysýymen, eldiń jetekshi kásibı medısınalyq qaýymdastyqtarynyń qoldaýymen QR Densaýlyq saqtaý mınıstrliginiń jáne Kardıologıa jáne ishki aýrýlar ǴZI uıymdastyrýymen «Metabolıkalyq sındrom – 2025: HHİ ǵasyrdyń jahandyq trendteri men syn-qaterleri» taqyrybynda halyqaralyq ǵylymı-praktıkalyq konferensıa ótti.
Metabolıkalyq sındrom – qazirgi klınıkalyq tájirıbedegi eń ózekti jaǵdaılardyń biri, 2 tıpti qant dıabeti, júrek-qan tamyrlary aýrýlary, alkogólsiz baýyrdy maı basý aýrýlary, semizdik jáne basqa sozylmaly ınfeksıalyq emes aýrýlardyń damýymen tyǵyz baılanysty. Dúnıejúzilik densaýlyq saqtaý uıymy álemdegi eresek turǵyndardyń 25%-dan astamynda metabolıkalyq sındrom belgileri bar dep esepteıdi.
İs-sharanyń negizgi maqsaty – metabolıkalyq buzylýlardy dıagnostıkalaý, aldyn alý jáne emdeý máselelerinde medısınanyń ártúrli baǵyttaryndaǵy mamandardyń habardarlyǵyn arttyrý. Kongres gastroenterologıa, endokrınologıa, kardıologıa, tamaqtanýdy qoldaý, barıatrıalyq hırýrgıa jáne komorbıdti naýqastardy basqarýdyń psıhoáleýmettik aspektileri týraly ózekti taqyryptardy tarqatty.
– Metabolıkalyq sındrom pánaralyq problema bolǵandyqtan, bizdiń ınstıtýt tájirıbe almasý alańyna aınaldy. Mamandarymyz osy salada bilim berý jáne ǵylymı jobalardy júzege asyrýda. Biz halyqaralyq sarapshylardy shaqyryp, tájirıbe almasyp, jańa trendterdi talqylap, problemalardy sheshý joldaryn izdeımiz, – dedi kongres qatysýshylary aldynda sóz sóılegen KİAǴZI Basqarma tóraǵasynyń ǵylymı-klınıkalyq jáne ınovasıalyq qyzmet jónindegi orynbasary Jamılá Qaıbýllaeva.
Al ınstıtýttyń endokrınologıa kafedrasynyń meńgerýshisi, QR Densaýlyq saqtaý mınıstrliginiń bas endokrınology Laýra Danárova bul derttiń jastar arasynda jıilep bara jatqanyn jáne bul úrdis búkil álemde de baıqalatynyn atap ótti.
«Búgin biz 2 tıpti qant dıabetiniń barıatrıalyq nemese metabolıkalyq hırýrgıasy sıaqty ózekti taqyrypty qarastyryp jatyrmyz. Bul 2 tıpti qant dıabetin emdeýdiń, hırýrgıalyq ádisterdi qoldanýdyń jańa standarttarynyń biri», – dedi dáriger.
Grýzıadan kelgen profesor, m.ǵ.d., endokrınolog Elena Gıorgadze metabolıkalyq buzylystarynyń negizgi sebebi adamnyń ómir surý salty: qımylsyzdyq, artyq tamaqtaný jáne tamaqtaný tártibiniń buzylýy dep sanaıdy. Sozylmaly juqpaly emes aýrýlardyń ósýimen elder arasynda bilim almasý mańyzdy bolyp otyr.
Kongres taqyryptarynyń ishinde semizdikti, qant dıabetin, baýyrdyń metabolıkalyq-assosıasıalanǵan steatotıkalyq aýrýyn emdeýge, endokrındik buzylýlardy dıagnostıkalaý men emdeýdiń, barıatrıalyq hırýrgıa men nýtrıtıvtik qoldaýdyń sondaı-aq pasıentterdi baqylaýdyń psıhosomatıkalyq aspektileriniń zamanaýı ádis-tásilderine erekshe nazar aýdaryldy.
Kongres respýblıkada pánaralyq kózqarasty qalyptastyrýǵa jáne medısınalyq kómektiń sapasyn jetildirýge mańyzdy úles qospaq.