Jeke medısınalyq kitapsha jumysqa jiberilgeni týraly belgimen beriledi
Sanıtarlyq-epıdemıologıalyq baqylaý komıteti «Jeke medısınalyq kitapshalardy berý, esepke alý jáne júrgizý qaǵıdalaryn bekitý týraly» Densaýlyq saqtaý mınıstriniń buıryǵyna ózgeris engizbek, dep habarlaıdy Almaty-akshamy.kz QazAqparatqa silteme jasap.
Qujatta kórsetilgendeı, endi medısınalyq kitapsha eki nusqada bolady:
- jeke medısınalyq kitapsha - jumysqa jiberý týraly belgisi bar mindetti medısınalyq qarap-tekserýlerdiń nátıjeleri engiziletin derbes qujat;
- jeke elektrondyq medısınalyq kitapsha - túpnusqa qujattyń túri men aqparatyn (derekterin) elektrondyq-sıfrlyq nysanda tolyq jańǵyrtatyn qujat.
«Jeke medısınalyq kitapsha jumysqa jiberilgeni týraly belgimen beriledi. Al elektrondyq medısınalyq kitapsha jumysqa jiberý týraly belgisi bar elektrondyq-sıfrlyq nysanda beriledi jáne elektrondyq sıfrlyq qoltańba arqyly kýálandyrylady. Ony tek medısınalyq qyzmetke lısenzıasy bar uıym beredi», - delingen buıyryq jobasynda.
Elektrondyq medısınalyq kitapshada myna málimetter qamtylady:
1. Jeke medısınalyq kitapsha ıesiniń fotosýreti (elektrondyq formatta).
2. Jeke kýálik nemese pasport boıynsha jeke medısınalyq kitapshanyń ıesi týraly málimetter, onyń qoly, jeke medısınalyq kitapshanyń serıasy men nómiri.
3. Jeke medısınalyq kitapsha ıesiniń kásibi men laýazymy, jumys orny, týǵan kúni, turǵylyqty jeri.
Engizilýi múmkin elektrondyq medısınalyq kitapshada azamattyń derti, ekpeleri, dáriger taǵaıyndaǵan em túrleri sıaqty barlyq aqparat kórsetiletin bolady.