Qazaqstannyń Avtokólik Odaǵy bergen málimet boıynsha tamyz aıynda elde 18 myńnan astam jańa avtomobıl satylǵan.
Osylaısha kólik saýdasy ózindik rekordty jańartyp otyr. Bul otandyq avtorıteıl tarıhyndaǵy eń jaqsy kórsetkish, dep habarlaıdy Almaty-akshamy.kz 24.kz-ke silteme jasap.
Naryq álemdik daǵdarystan soń jandanyp, dılerlik ortalyqtar tanymal avtobrendterdiń kólikterimen tolyqty. Qazaqstannyń Avtokólik Odaǵy sarapshylarynyń aıtýynsha satylym modelder sanynyń, ásirese búdjettik avtomobılder qatarynyń artýymen baılanysty. Qazaqstandyqtar jańa modelderdiń tehnologıasy men sapasyn jaqsy baǵalap, túrli qarjylyq baǵdarlamalardy qoldanǵan. Qazaqstannyń Avtokólik Odaǵy avtomobıl men avto bólshekterdi lokolızasıalaýǵa erekshe mán berip otyr.
Anar Maqasheva, Qazaqstannyń Avtokólik odaǵynyń prezıdenti: Qazaqstanda shynaıy avtomobıl óndirisin qalyptastyrý úshin biz elimizde avtokomponentterdi kóp shyǵarýǵa den qoıamyz. Biz Qazaqstanda avtomobıl arzandaý úshin barlyq jigerimizdi jumsaımyz.
Endi avtokomponentter «Astana Motors» kompanıasynyń tehnoparkinde shyǵarylady. Bul jerde kóp uzamaı mashınaǵa arnalǵan oryndyq, mýltımedıa men plasıkalyq buıymdar jasaıtyn úsh zavod ashylady. Alǵashqy ónimder kelesi jyly paıdalanýǵa beriledi.
Asqar Ibrashev, Astana Motors Engineering dırektory:
- Memleket basshysy Qazaqstan halqyna joldaýynda ekonomıkanyń óńdeýshi sektoryn damytýǵa, onyń ishinde avtomobıl bólikterin jasaýdyń mańyzyn atap ótti. Biz shaǵyn jáne orta bızneske Almaty men Qazaqstandaǵy avtomobıl kásiporyndaryna qajetti bólshekterdi óndirý úshin klaster quramyz. Bul bolashaqta avtomobıl baǵasyna oń yqpal etedi.
Bıyl segiz aıda 120 myńnan astam jańa kólik satylsa, sonyń 73 prosenti Qazaqstanda jasalǵan. Iaǵnı, qazaqstandyq kásiporyndar qańtar-tamyz aıynyń arasynda 96 myń avtomobıl shyǵarǵan. Bul ótken jyldyń osy kezeńimen salystyrǵanda 41 prosentke kóp.