Qazaqstanda fýtboldan jańa jasóspirimder lıgasy quryldy, dep habarlaıdy Almaty-akshamy.kz Egemen.kz-ke silteme jasap.
«QJ League maqsaty - ulttyq quramǵa sapaly rezerv daıyndaý. Bul bizdiń balalar men jasóspirimder fýtbolyn damytýdaǵy negizgi jobalarymyzdyń biri. Jańa lıga arqyly biz daryndy balalardy daıyndaýǵa kómektesetin jarys júıesin quramyz. Bul jas talanttar úshin kásibı fýtboldaǵy alǵashqy qadam bolady», – dedi Qazaqstan fýtbol federasıasynyń prezıdenti Ádilet Barmenqulov elordada ótken baspasóz máslıhatynda.
Lıgaǵa elimizdiń barlyq óńirinen jas fýtbolshylar qatysady. Týrnırdiń birinshi maýsymyna 18 jasqa deıingi 12 komanda qatyspaq. 2025 jyly QJ lıgasynda uldar úshin alty lıga (úsh jas sanatyna oraı eki lıga) jáne qyzdar arasynda bir lıga qurylady dep josparlanýda. Jalpy jarysqa 70-ten astam komanda men 3000 sportshy qatysady dep kútilýde.
«Elimizde kóptegen daryndy balalar bar. Biraq olardyń ózderin kórsetýge únemi múmkindikteri bola bermeıdi. QJ lıgasyn qurý arqyly biz olarǵa múmkindik beremiz. Balalar fýtbolynyń damýyna júıeli túrde qaraý kerek. Áıtpese, oń nátıje bolmaıdy. QJ League- qazaqstandyq fýtboldaǵy revolúsıa ispetti, endi jasóspirimder 100% kásibı deńgeıde uıymdastyrylatyn týrnırge qatysady. QJ League búkil qazaqstandyq fýtbol úshin erekshe trıgger bolatynyna, onyń damýyna kómektesetinine senimdimin», - deıdi QJ lıgasynyń prezıdenti Rohýs Shoh.
QJ League-2023 qatysýshylarynyń quramy: «Aqsý» (Pavlodar oblysy), «Aqtóbe», «Astana», «Atyraý», «Jas qyran» (Almaty), «Qaırat» (Almaty), «Qaısar» (Qyzylorda), «Kaspıı» (Aqtaý), «Ońtústik» (Shymkent), «Ordabasy» (Shymkent), «Taraz», «Shahter» (Qaraǵandy).
Lıganyń bıylǵy maýsymynda 132 mach ótedi. Týrnırde ár komanda 22 mach ótkizedi (úıde jáne syrtta 11 mach). Maýsym qazan aıynda aıaqtalady.
Fýtboldan jasóspirimder lıgasynyń alǵashqy machy 22 sáýirde «Astana Arena» sport kesheninde saǵat 17:00-de bastalady.