Bıylǵy qorytyndy boıynsha eldegi egis alqaby 78,2 myń gektardan 22,7 mln ga alqapqa deıin artty.
QR Premer-Mınıstri Asqar Mamınniń tóraǵalyǵymen ótken Úkimettiń selektorlyq otyrysynda kóktemgi egis jumystarynyń qorytyndysy qaraldy, dep habarlaıdy Almaty-akshamy.kz Primeminister.kz saıtyna silteme jasap.
Aýyl sharýashylyǵy mınıstri Saparhan Omarov, ekologıa, geologıa jáne tabıǵı resýrstar mınıstri Maǵzum Myrzaǵalıev, Soltústik Qazaqstan oblysynyń ákimi Qumar Aqsaqalov, Qostanaı oblysynyń ákimi Arhımed Muhambetov, Aqmola oblysynyń ákimi Ermek Marjyqpaev baıandama jasady.
Bıyl Qazaqstanda kóktemgi dala jumystary ońtaıly merzimde aıaqtaldy, onyń qorytyndysy boıynsha egis alqaby 78,2 myń gektardan 22,7 mln ga alqapqa deıin artty. Dándi jáne dándi-burshaqty daqyldar 15,7 mln ga alqapqa egilgen. Áleýmettik mańyzy bar azyq-túlik taýarlarynyń baǵasyn baqylaý, rentabeldiligi joǵary daqyldardyń ónimdiligin arttyrý, ımport almastyrý boıynsha jumystar sheńberinde maıly daqyldar alqaby 2,9 mln ga deıin (+11,9 myń ga), jem-shóp daqyldary alqaby 3,4 mln ga deıin (+104,2 myń ga), kókónis-baqsha daqyldary alqaby 275,2 myń ga (+10,6 myń ga), kartop alqaby 198 myń ga deıin (+5,8 myń ga) ulǵaıtyldy.
«Kóktemgi egis jumystaryn sapaly ári ýaqytynda júrgizý úshin qarjylaı jáne materıaldyq-tehnıkalyq qamtamasyz etý boıynsha barlyq qajetti sheshimder qabyldandy», — dedi Asqar Mamın.
Agroónerkásiptik keshen sýbektilerin qoldaý úshin «Agrarlyq nesıe korporasıasy» AQ respýblıkalyq búdjetten 70 mlrd teńge kóleminde búdjettik nesıe bóldi. Sońǵy qaryz alýshylar úshin syıaqy mólsherlemesi jyldyq 5%-dan aspaıdy. Bólingen qarajat 3,3 mln ga egis alqabyn qamtı otyryp, 2600 AÓK sýbektisin qarjylandyrýǵa múmkindik beredi.
Búdjettik kredıtpen qatar bıyl aýyl sharýashylyǵy ónimin forvardtyq satyp alý úshin bólinetin qarajat kólemi 24,5 mlrd teńgeden 47 mlrd teńgege deıin ulǵaıdy. Agroónerkásiptik keshen sýbektilerine naryqtyq baǵadan 14%-ǵa tómen baǵamen 380 myń tonna dızel otyny bólindi, 405,3 myń tonna tyńaıtqysh tıeldi. Bul rette memleket aýyl sharýashylyǵy óndirýshileriniń tyńaıtqyshtar men pestısıdterdi satyp alýǵa jumsaǵan shyǵyndarynyń 50%-yna deıin sýbsıdıalaıdy. Egis naýqanynyń qorytyndysy boıynsha, aýyl sharýashylyǵy daqyldarynyń barlyǵy 2,5 mln tonna kondısıalyq tuqymy sebildi.
Úkimet basshysy aýyl sharýashylyǵy, energetıka, ındýstrıa jáne ınfraqurylymdyq damý mınıstrlikterine oblystardyń ákimdikterimen birlesip, agrohımıkattar men mıneraldy tyńaıtqyshtardyń jáne arzandatylǵan dızel otynynyń qajetti kólemin ýaqytynda berýdi qamtamasyz etýdi tapsyrdy. Ekologıa mınıstrligine oblys ákimdikterimen birlesip, qysqa merzimde elimizdiń ońtústiginde fermerlerdi sýarmaly sýmen qamtamasyz etý máselesin sheshý boıynsha josparlanǵan is-sharalardy ótkizý tapsyryldy.