Pavlodar pedagogıka ýnıversıtetiniń Qosymsha bilim berý ınstıtýtynda zeınet jasyna deıingi jáne zeınet jasyndaǵy azamattar bilim alyp jatyr.
QR Ǵylym jáne joǵary bilim mınıstrliginiń málimetinshe, ınstıtýtta «Kúmis ýnıversıtet» jobasy iske asyrylýda, dep habarlaıdy Almaty-akshamy.kz QazAqparatqa silteme jasap.
Búginde munda zeınet jasyna deıingi jáne zeınet jasyndaǵy 50-den astam stýdent bilim alady. Egde jastaǵy adamdarda aptasyna bir ret kompúterlik saýattylyq, pishý jáne tigin, beıneleý óneri jáne ıoga kýrstaryna tegin qatysý múmkindigi bar. Ýnıversıtet oqytýshylary olarǵa salaýatty ómir salty, psıhologıa jáne basqa da qyzyqty taqyryptar boıynsha dárister oqıdy.
Jaratylystaný ǵylymdary joǵary mektebiniń dosenti, bıologıa ǵylymdarynyń kandıdaty Baqytjamal Ǵabdýlhaeva «Óz densaýlyǵyń - óz qolyńda» taqyrybynda dárister oqıdy. Ol júrek-qan tamyrlary jáne basqa da aýrýlardyń damý qaýpin azaıtýǵa kómektesetin salaýatty ómir saltynyń negizgi erejeleri týraly aıtady.
Egde jastaǵy adamdar tek leksıalarǵa ǵana emes, sonymen qatar semınarlarǵa, sheberlik sabaqtaryna belsendi qatysady, olar ártúrli áleýmettik-mádenı taqyryptarǵa úlken qyzyǵýshylyq tanytady. «Kúmis ýnıversıtettiń» stýdentteri oqý jylynyń sońyna deıin sabaqqa qatysady. Sońynda barlyǵyna sertıfıkat beriledi.