2023 jyldyń basynan 2021-2025 jyldarǵa arnalǵan kásipkerlikti damytý jónindegi ulttyq joba sheńberinde jańa bıznes-ıdeıalardy iske asyrý úshin 9 093 grant berildi, dep habarlaıdy almaty-akshamy.kz
2023 jylǵy 11 qyrkúıekten bastap 22 qyrkúıekke deıin granttardyń úshinshi legi boıynsha ótinimder qabyldandy. Búgingi tańda úmitkerlerdiń ótinishterin qaraý jónindegi komısıa óz jumysyn aıaqtady, kelisimsharttarǵa qol qoıý jáne grant alýshylarǵa qarajat aýdarý prosesi jalǵasýda.
Granttardyń úshinshi legi aıasyndla úmitkerlerden barlyǵy 15,5 myń, onyń ishinde kópbalaly otbasylardan – 9 myń, múgedektigi bar adamdardan – 3 myń, múgedektigi bar balaǵa kútim jasaıtyn adamdardan – 1,9 myń, ataýly áleýmettik kómek alýshylardan – 771 ótinish qabyldandy. Sondaı-aq, asyraýshysynan aıyrylǵan 586 adam, 57 qandas jáne 196 qonys aýdarýshy ótinish berdi.
Ótinimderdiń eń kóbi Túrkistan (3,7 myń), Jambyl (2,1 myń), Qyzylorda (1,8 myń) oblystarynyń jáne Shymkent qalasynyń (1,8 myń), eń azy Ulytaý (120) jáne Qostanaı (104) oblystarynyń úmitkerlerinen kelip tústi.
Granttardy eńbek mobıldiligi ortalyqtary grant alýǵa úmitkerlerdiń ótinishterin qaraý jónindegi aýdandyq/qalalyq komısıanyń sheshimi negizinde beredi.
Úmitkerler ózderiniń bıznes-jobalaryn komısıa otyrystarynda tanystyrady. Komısıa otyrysynyń ótkiziletin orny, kúni men ýaqyty týraly habarlama Business.enbek.kz portalynda grant alýǵa ótinish berýshiniń jeke kabınetinde kórsetiledi.
Bul rette komısıanyń árbir múshesi bıznes-jospardy baǵalaıdy jáne baǵalaý paraǵyn mynadaı krıterııler boıynsha toltyrady: bıznes-ıdeıanyń básekege qabilettiligi, ótkizý naryqtarynyń pysyqtalýy, bıznes-jobanyń qarjylyq ómirsheńdigi, kásipkerlik daǵdylardyń deńgeıi, jańa jumys oryndaryn qurý.
Osylaısha, grant berý týraly sheshim komısıalyq jáne úmitkerlerdiń bıznes-jobalarynyń pysyqtalýyn baǵalaýdyń naqty krıterııleri negizinde qabyldanady.
Komısıanyń sheshimi úmitkerdiń Business.enbek.kz portalyndaǵy jeke kabınetine jiberiledi. Komısıa oń sheshim qabyldaǵan jaǵdaıda úmitker salyq organdarynda óz qyzmetin tirkeıdi, banktik derektemelerdi usynady, shartqa qol qoıady jáne odan ári toqsan saıyn bólingen qarajattyń paıdalanylýy týraly esepterdi usynady. Munyń bári eńbek mobıldiligi ortalyqtaryna barmaı-aq, elektrondyq formatta jasalady.