Telefonǵa telmirgen balalar kóbeıip keledi. Elimizde balalardyń 33,9% kúnine 2 jáne odan da kóp saǵatyn túrli qurylǵylar ekranynyń aldynda ótkizedi
Mundaı derekti «Qazaqstandaǵy balalar semizdiginiń taralýyn zertteý» konferensıasynda QR Densaýlyq saqtaý mınıstrligi qoǵamdyq densaýlyq saqtaý ulttyq ortalyǵynyń basqarma tóraǵasynyń mindetin atqarýshy Janar Qalmaqova keltirdi, dep habarlaıdy Almaty-akshamy.kz QazAqparatqa silteme jasap.
«Zertteý nátıjelerinen belgili bolǵandaı, balalardyń 33,9% kún saıyn eki jáne odan da kóp saǵatyn túrli qurylǵylar ekranynyń aldynda ótkizedi. Bul kórsetkish qalalarda 37,2 paıyzdy, aýyldarda 30 paıyzdy qurap otyr. Osynyń saldarynan bala kóp qımyldamaı, kóziniń kórý qabileti nasharlaıdy. Sondyqtan balalardyń teledıdar, telefon, kompúter nemese planshetten túrli múltfılm kórip, oıyn oınaýlaryn shekteý kerek», - dedi ol.
Janar Qalmaqovanyń dereginshe, elimizde oqýshylardyń 77,2 paıyzy mektepke jaıaý nemese velosıpedpen barady. Kúnine 1 saǵat nemese odan da kóp ýaqyt fızıkalyq belsendi balalardyń úlesi – 86,8 paıyz.
«Mektepterdiń 90,8 paıyzy balalarǵa sabaqtan tys ýaqytta bilim ordasynyń ashyq sporttyq alańdarynda oınaýǵa ruqsat bergen. Al ishtegi sport zalda sabaqtan tys ýaqytta oınaýǵa mektepterdiń 88,9 paıyzy múmkindik berip otyr», - dedi QR DSM qoǵamdyq densaýlyq saqtaý ulttyq ortalyǵynyń basqarma tóraǵasynyń mindetin atqarýshy.