Elimizde 2-6 qyrkúıek aralyǵynda ateroskleroz aptalyǵy ótip jatyr. Onyń sheńberinde óńirlerde aterosklerozǵa baılanysty habardarlyqty arttyrýǵa, sondaı-aq osy aýrýdy emdeýdiń aldyn alý sharalary men emdeýdiń zamanaýı tásilderin ilgeriletýge baǵyttalǵan is-sharalar uıymdastyrylýda, dep habarlaıdy aqshamnews.kz
Biz salaýatty ómir saltynyń júrek pen qan tamyrlary úshin mańyzdylyǵy týraly jıi estımiz, biraq olardyń saýlyǵy bizdiń bolashaǵymyzǵa qalaı áser etetini týraly oılanamyz ba? Qazaqstanda júrek-qan tamyrlary aýrýlary ólim sebepteri arasynda birinshi orynda tur, barlyq ólimniń 47%-y ınsýlt pen ınfarktqa baılanysty.
Sondyqtan júrek pen qan tamyrlarynyń saýlyǵy uzaq jáne belsendi ómir súrýdiń kepili bolyp tabylady. Eger siz qaýipter týraly bilseńiz jáne ýaqytyly áreket etseńiz, osy aýrýlardyń kópshiliginiń aldyn alýǵa bolady. Osy taqyrypta Almatydaǵy Kardıologıa jáne ishki aýrýlar ǴZI kardıologıa bólimshesiniń kardıolog dárigeri Vıtalıı Pavlovpen sóılesken edik.
Dárigerdiń aıtýynsha, ateroskleroz – bul arterıalardyń ishindegi búrtik túıinderdiń jınalýy. Holesterın, maılardan jáne basqa zattardan turatyn bul túıinder arterıalardy taryltyp, qan aǵymyn shektep, mıokard ınfarkti men ınsýlt sıaqty kúrdeli problemalardy týdyrýy múmkin.
Kóbinese aýrý kóptegen jyldar boıy eshqandaı belgilersiz, arterıalardyń qatty tarylýyna ákeledi. Bul kezeńde júrekke nemese mıǵa júktemeniń shamaly artýy da aýyr saldarǵa ákelýi múmkin.
«Aterosklerozdy kim jáne qashan tekserý kerek? 20 jastan bastap lıpıdti profılge qan analızin tapsyrýdy jáne aýytqýlar bolǵan jaǵdaıda kardıologpen keńesýdi usynamyz. Sondaı-aq, ómirinde bir ret barlyq adamdarǵa Lp(a) úshin qan analızin tapsyrǵan jón, bul da lıpıdter almasýynyń kórsetkishi, ol genetıkaǵa baılanysty jáne ómir boıy ózgermeıdi. Muny 40 jastan asqan barlyq (tipti saý) adamdar úshin jasaý óte mańyzdy», – deıdi Kardıologıa jáne ishki aýrýlar ǴZI kardıologıa bólimshesiniń kardıolog dárigeri Vıtalıı Sergeevıch.
Al eger sizde qaýip faktorlary bolsa (temeki shegý, joǵary holesterın, gıpertonıa, qant dıabeti, artyq salmaq nemese semizdik), onda múmkindiginshe erterek jáne ómir boıy júıeli túrde júgingen durys.
Ateroskleroz jastarǵa da áser etýi múmkin, ásirese Sizdiń otbasyńyzda erte (50 jasqa deıin) ınfarkt, ınsýlt jáne kenetten júrek ólimi bolsa – onda 2 jasqa tolǵannan bastap múmkindiginshe erterek tekserýden ótken jón.