Elimizdegi eń alǵashqy saýda ortalyǵyna – 60 jyl.
Kópshilikke «SÝM» ataýymen tanymal saýda orny 1961 jyly Almatyda ashyldy. Ortalyq ámbebap dúken qalanyń ortalyǵynda, Jibek joly kóshesinde boı kótergen, dep habarlaıdy Almaty-akshamy.kz.
Almaty.tv saıtynyń málimetinshe, Almatyda alǵashqy bolyp ashylǵan mundaı saýda ortalyqtary keıinnen Shymkent, Qaraǵandy syndy qalalarda da boı kótere bastaǵan. Almaty halqyn alǵash ret álemdik brendtermen tanystyrǵan saýda ornynda azyq-túlik, shet memleketten ákelingen kıim-keshek, turmystyq tehnıka men jıhazdyń úlken tańdaýy bolǵan. Ortalyq basshysynyń aıtýynsha, ol kezderi taýarlarǵa degen suranystyń kóptiginen, sóreler dereý bosap qalatyn.
«SÝM» ujymy Máskeýdegi Olımpıada oıyndarynyń qonaqtaryna qyzmet kórsetti. Sebebi alǵashqy ret bizde merdigerlerdiń jalǵa alýy syndy qyzmet kórsetýdiń formalary paıda bolǵan edi. Ol kezderi saýda ortalyǵynyń jyldyq taýar aınalymy 1000 mıllıon rúbldeı boldy. Bul óte úlken soma bolatyn. Nysan aýqymdy jóndeý jumystarynan keıin 2014 jyly sáýlet ónerindegi Hi-tech stılinde qaıta ashyldy. Osylaısha ǵımarattyń aýmaǵy da keńeıdi», – dedi saýda ortalyǵynyń dırektory Sergeı Ivanov.
Bastapqyda saýda ortalyǵy memlekettiń qaramaǵynda boldy. 90-shy jyldardaǵy toqyraýdan keıin dúken jekemenshik kásipkerlerdiń qol astyna berilip, birneshe ret jóndeýden ótti.
Saýda ortalyǵy qansha jóndeýden ótse de, tarıhı jádiger retinde saqtalǵan bóligi bar. Máselen, mramordan jasalǵan baspaldaq pen onyń jıegi de 60-shy jyldardan qalǵan. Sondaı-aq, saýda ornynyń qasbetindegi órnekteri de ǵımarattyń alǵashqy sáýletindegi elementter eken.
Alǵashynda saýda ortalyǵynda 50-deı satý bólimi bolsa, qazir olardyń sany bir jarym myńǵa jetken.