Qazaqstanda alǵashqy atom elektr stansıasyna ataý berýge jalpyhalyqtyq konkýrs bastaldy,- dep habarlaıdy Aqshamnews.kz tilshisi.
25 qyrkúıek saǵat 12:00-de elimizde alǵashqy atom elektr stansıasyna (AES) ataý berý boıynsha jalpyhalyqtyq konkýrs resmı túrde bastaldy. Saýalnama eGov Mobile mobıldi qosymshasynda ótedi. Qatysý úshin qosymshada "AES-ke ataý usynyńyz" bannerin basyp, óz nusqańyzdy joldaý jetkilikti. Paıdalanýshylarǵa konkýrstyń bastalǵany týraly arnaıy push-habarlamalar jiberiledi.
Uıymdastyrýshylardyń málimetinshe, bastamanyń maqsaty - bolashaq stansıaǵa eldiń tarıhı, mádenı jáne ulttyq ereksheligin beıneleıtin maǵynaly ataý tańdaý. Azamattar qazaq nemese orys tilin tańdap, ataýdyń mánin qysqasha túsindirip jazýy kerek. Sonymen qatar qatysýshylar resmı qaǵıdalarmen tanysqanyn rastaýy qajet. Usynystardy qabyldaý 2025 jylǵy 10 qazan, saǵat 23:59-ǵa deıin jalǵasady.
Konkýrs erejelerimen atom energıasy jónindegi agenttiktiń resmı saıtynda jáne áleýmettik jelilerinde tanysýǵa bolady.
Uıymdastyrýshylar barlyq qazaqstandyqty energetıka salasynyń tarıhyna úles qosyp, elimizdiń alǵashqy AES-na laıyqty ataý usynýǵa shaqyrady.
Eske salaıyq, 11 tamyzda Prezıdent Qasym-Jomart Toqaev Qazaqstandaǵy alǵashqy atom elektr stansıasyna ataý tabý úshin ashyq konkýrs ótkizýdi usynǵan bolatyn. Jobaǵa energetıka mınıstri Almasadam Sátqalıev, onyń orynbasary Tımýr Jantıkın, Májilis pen Senat depýtattary, jýrnalıser, jazýshylar, ǵalymdar jáne blogerlerden quralǵan komısıa jetekshilik etedi.