Qytaımen shekarada 3-shi temirjol ótkizý pýnktin ashý, «Baqty» jáne «Qaljat» jańa qurǵaq porttaryn salý josparlanyp otyr.
Iaǵnı Qazaqstan Eýropa men Taıaý Shyǵys baǵytynda júk tasymaldaýǵa belsendi túrde qolaıly jaǵdaılar jasaýda. Osy jáne ózge de iri jobalar jaıly Shanhaıda uıymdastyrylǵan kórmede aıtyldy, dep habarlaıdy Almaty-akshamy.kz.
Shanhaıǵa jumys sapary barysynda premer-mınıstr Álıhan Smaıylov Qytaıdyń Memlekettik keńesiniń Premeri Lı Sánmen kezdesý ótkizip, onda eki el arasyndaǵy saýda-ekonomıkalyq yntymaqtastyqtyń ózekti máseleleri talqylandy.
«Memleketterimizdiń basshylary qarym-qatynasymyzdy odan ári damytýdyń basym mindetteri men baǵyttaryn belgiledi. Biz qazaqstandyq áriptesterimizben osy joǵary deńgeıdegi kelisimderdi is júzinde júzege asyrý úshin kúsh-jiger jumsaýǵa daıynbyz. Mundaı yntymaqtastyq bizdiń halqymyzdyń ómir súrý deńgeıine oń áser etedi», - deıdi QHR memlekettik keńesiniń premeri Lı Sán.
Álıhan Smaıylov qatysýshy el delegasıasynyń basshysy retinde Shanhaıda ótken Qytaıdyń 6-shy halyqaralyq ımporttyq kórmesiniń resmı ashylý saltanatyna qatysyp, sóz sóıledi.Úkimet basshysy qazirgi tańda bul aýqymdy kórme jyl saıyn álemniń 130-dan astam eliniń ókilderi qatysatyn jahandyq iskerlik alańǵa aınalǵanyn atap ótip, eki el arasyndaǵybaılanystyń artyp kele jatqanyna toqtaldy.
«Ótken jyly bizdiń elderimizdiń arasynda taýar aınalymy 24 mlrd dollardan asyp, rekordtyq kórsetkishke jetti. Osy jyldyń 9 aıynda ǵana ózara saýda taǵy 20 prosentke ósip otyr. Aldaǵy ýaqytta biz taýar aınalymyn 40 mlrdqa jetkizýge nıettimiz. Osyǵan baılanysty biz búkil qytaılyq kásiporyndardy yntymaqtastyqty keńeıtýge shaqyramyz», - deıdi QR premer-mınıstri Álıhan Smaıylov.
Qazirgi ýaqytta Qazaqstan halyqaralyq mańyzy bar kólik-logıstıkalyq torapqa aınalý úshin eleýli kúsh-jiger jumsaýda. 2014 jyldan beri Lánúngan portynda qytaılyq seriktestermen birlesip qurylǵan logıstıkalyq termınal jumys isteıdi. 2023 jyldyń mamyr aıynda Sıan qurǵaq portynda qazaqstandyq termınaldyń qurylysy bastaldy. Al, Ulttyq pavılon sheńberinde Qazaqstan san túrli sala boıynsha múmkindikterin kórsetti.
«Qytaıdyń geografıalyq jaqyndyǵy, logıstıka jaǵynan yńǵaıly , sondyqtan Qytaı naryǵy biz úshin qyzyqty bolyp keledi. Onyń ústine óte jaqsy týrısik baǵyt bolyp keledi. Jyl saıyn myńdaǵan týrıs keledi. Biz ózimizdiń tabıǵatymyzdy, ónimimizdi kórsetýge daıynbyz», - «Arba Wine» JSHS basqarma múshesi Ásem Túsipbaeva.
Qazaqstandyq komersıalyq stendti aralaý barysynda delegasıa basshylary otandyq kásiporyndardyń ónimderimen jáne usynystarymen jan-jaqty tanysty. Jalpy, sońǵy 5 jylda Qytaıdyń halyqaralyq ımport kórmesine Qazaqstannan 133 kompanıa qatysyp, sonyń arqasynda quny 260 mln dollardan astam somaǵa tıimdi eksporttyq kelisimsharttar jasaldy.