Búginde elimizde jetim balalar men ata-anasynyń qamqorlyǵynsyz qalǵan balalarǵa jeke qoldaý men kómek kórsetetin tálimgerlik ınstıtýtyn engizý jónindegi joba tabysty iske asyrylýda. Elimizdiń 17 qalasynda 300-den astam adam tálimger atandy.
Tálimgerlik jetim balalar men ata-anasynyń qamqorlyǵynsyz qalǵan balalardyń ál-aýqatyn qamtamasyz etýdiń mańyzdy quraly bolyp tabylady. Ol balany qoǵamǵa beıimdeýge jáne óz betinshe eresek ómir súrýge daıyndaýǵa baǵyttalǵan, dep habarlaıdy Almaty-akshamy.kz Oqý-aǵartý mınıstrligine silteme jasap.
Tálimgerlikke kandıdattardy irikteý prosesin qorǵanshy jáne qamqorshy organdar júzege asyrady. Árbir kandıdat áńgimelesý arqyly ótedi, sondaı-aq turǵyn úı-turmystyq jaǵdaılary da eskeriledi. İrikteýdiń barlyq kezeńderinen ótip, tıisti qorytyndy alǵannan keıin ǵana kandıdat tálimger bola alady.
Kandıdattarǵa qoıylatyn talaptar QR azamattyǵyn, kámeletke tolýyn, sottylyǵynyń joqtyǵyn, áreketke qabilettiligin, turǵylyqty jeriniń bolýyn jáne t.b. qamtıdy. Tálimgerdiń balaǵa qosymsha bilim berý men medısınalyq qyzmetterdi qosa alǵanda, túrli salalarda qoldaý kórsetýge quqyǵy bar.
Aıta ketý kerek, bıyl «Bala quqyqtary týraly» zańǵa jetim balalarǵa tálimgerlik jasaý ınstıtýtyn engizýge baǵyttalǵan ózgerister engizildi. Bul qadam ata-anasynyń qamqorlyǵynsyz qalǵan balalardyń bolashaǵyna oń yqpal etip qana qoımaı, áleýmettik salada ilgerileýdiń jarqyn mysaly bola alady.