Jyl basynan beri respýblıkada 18 myń adam kólikti mas kúıinde basqarǵan
Ókinishtisi sol, atalǵan zań buzýshylyqqa qatysty taǵaıyndalatyn jaza ótken jyly qatańdatylǵanymen, ishimdikke sylqıa toıyp rólge otyratyndar sany azaımaı otyr, dep habarlaıdy Almaty-akshamy.kz
Habar 24 saıtynyń aqparaty boıynsha, byltyr qabyldanǵan zań boıynsha kólik quralyn minip esirgender 7 jylǵa júrgizý quqyǵynan aıyrylyp, 15 táýlikke qamalady. Al júrgizý kýáliginsiz mas kúıinde ustalǵandar temir tulpardy basqarý quqyǵynan ómir boıyna aıyrylady. Búgingi kúni shamamen 2 myń 700 azamatqa osyndaı jaza taǵaıyndaldy. Jalpy, jyl basynan beri polısıa qyzmetkerleri qoǵamdyq tártipti saqtaý salasynda 6 mln-nan astam ákimshilik quqyq buzýshylyqtyń jolyn kesti. Onyń ishinde 5 mln astamy jol-kólik qozǵalysy boıynsha jasalǵan.
«Ótken jylmen salystyrǵanda, anyqtalǵan buzýshylyqtar 4 paıyzǵa kóp. Sonymen qatar búgingi kúni quqyqbuzýshylyqtardyń jolyn kesýge polıseıler aldyn alý sharalaryn kóbirek qoldanady. Mysaly, polısıa qyzmetkerleri shyǵarǵan uıǵarymdardyń 40 prosenti - quqyq buzýshylyqqa berilgen eskertý», - deıdi QR İİM Ákimshilik polısıa komıteti tóraǵasynyń orynbasary Serik Túsipov.