QR Energetıka mınıstri Bolat Aqsholaqov Májilis depýtattarynyń saýalyna osylaı jaýap berdi.
2025 jylǵa deıin Qazaqstanda 19 sý elektr stansasy salynady, dep habarlaıdy Almaty-akshamy.kz.
«Qazirgi ýaqytta respýblıkada belgilengen qýaty 2065 MVt bolatyn 136 jańartylatyn energıa kóziniń obektisi jumys isteıdi. Onyń ishinde qýaty 684 MVt bolatyn 40 jel elektr nysany, 1093 MVt elektr óndiretin 51 kún elektr nysany, jıyntyq qýaty 280 MVt bolatyn 40 sý elektr nysany, 8 MVt energıa óndiretin 5 bıoelektrostansıa bar. 2021 jyly jalpy qýaty 393 MVt bolatyn 19 nysan paıdalanýǵa berildi. 2022 jylǵy 1 toqsannyń qorytyndysy boıynsha, jańartylatyn energetıka obektileri óndirgen elektr qýatynyń kólemi - 933,07 mln kVt/s», - dep jazylǵan jaýapta.
Bolat Aqsholaqov joldaǵan jaýapqa qaraǵanda, 2025 jylǵa deıin qýaty 1074 MVt bolatyn 53 jańartylatyn energıa kóziniń jobasyn paıdalanýǵa berý josparlanǵan. Onyń ishinde qýaty 129,77 MVt bolatyn 19 sý elektr stansıasyn, 812,39 MVt qýat óndiretin 23 jel elektr stansıasyn, 116,95 MVt energıa shyǵaratyn 7 kún elektr stansıasyn, 15,35 MVt energıa beretin 4 bıoeletr stansıasyn salý kózdelgen.
«Atalǵan jobalardy iske asyrý sheńberinde shamamen 600 mlrd teńge ınvestısıa tartylady. Sonyń arqasnyda qosymsha 3,5 mlrd kVt/saǵ jasyl energıa óndirip, 6 000 ýaqytsha jáne 600 turaqty jumys oryndaryn qurýǵa bolady. Bıyl jalpy qýaty 290,6 MVt bolatyn jańartylatyn energıa kóziniń 10 obektisin iske asyrý josparlanyp otyr», - dep jazady mınıstr.
QR Indýstrıa jáne ınfraqurylymdyq damý mınıstrliginiń málimeti boıynsha, keıingi bes jylda elektr energıasyn tutyný kólemi 27 paıyz artqan. Sondaı-aq, Dúnıejúzilik bank Qazaqstannyń energıa júıesine aýdıt júrgizýge grant bóldi.