Bul shara Memleket basshysynyń bastamasy boıynsha júzege asyrylady.
Qyzyl kitapqa engen árbir zańsyz kesilgen aǵash úshin zıandy óteý mólsheri 6 AEK-ten 1000 AEK-ke deıin ulǵaıtyldy, dep habarlaıdy Almaty-akshamy.kz QR Ekologıa, geologıa jáne tabıǵı resýrstar mınıstrliginiń baspasóz qyzmetine silteme jasap.
Orman jáne tabıǵat qorǵaý mekemeleriniń is-qımylyn úılestirý jónindegi shtab quryldy. Aǵash egý jumystary bastaldy. Qazirdiń ózinde 26,1 myń ga alańda 80,5 mln.aǵash otyrǵyzyldy, kórsetilgen sharalar eldiń ormandylyǵyn 2030 jylǵa qaraı 5%-ǵa deıin jetkizýge múmkindik beredi.
«Aral teńiziniń qurǵaǵan túbine sekseýil otyrǵyzý jeke másele bolyp tabylady. 1990-2021 jyldar aralyǵynda 195 myń ga jerge sekseýil otyrǵyzyldy. Birneshe apta buryn arnaıy ekspedısıa barǵan, tıisti zertteý júrgizildi. Otyrǵyzylǵan sekseýil aýdany 337 myń ga quraǵany anyqtaldy. Qazir Memleket basshysynyń tapsyrmasy boıynsha biz Sekseýil otyrǵyzýdyń keshendi baǵdarlamasyn ázirlep jatyrmyz. 2021-2030 jyldary 1,1 mln ga jerge sekseýil otyrǵyzý josparlanyp otyr», - dedi QR Ekologıa, geologıa jáne tabıǵı resýrstar mınıstri.
Almaty qalasyndaǵy Sýlpak dúkeniniń janyndaǵy 11 aǵashty zańsyz kesý jaǵdaıynan keıin aǵashtardy zańsyz kesý, joıý jáne búldirý jaýapkershiligin arttyrý maqsatynda qoldanystaǵy zańnamaǵa aıyppuldy ulǵaıtý jáne buzýshylarǵa sanksıalardy qatańdatý bóliginde ózgerister men tolyqtyrýlar engizildi.
«Osylaısha, Qyzyl kitapqa engen árbir zańsyz kesilgen aǵash úshin zıandy óteý mólsheri 6 AEK-ten 1000 AEK-ke deıin ulǵaıtyldy. Budan basqa, ákimshilik jáne Qylmystyq kodeksterge orman qorynda jáne qalalar men eldi mekender sheginde aǵashtardy jáne butalardy zańsyz keskeni, joıǵany jáne zaqymdaǵany úshin quqyq buzýshylarǵa aıyppuldardy ulǵaıtý jáne sanksıalardy qatańdatý bóliginde ózgerister engizildi. Sondaı-aq ósimdikter dúnıesi resýrstaryn qorǵaý, ósimin molaıtý jáne paıdalaný jónindegi barlyq máselelerdi zańnamalyq retteý maqsatynda «Ósimdikter álemi týraly» Zań jobasy ázirlendi. Ol Májiliste qaralady».
Memleket basshysynyń tapsyrmasyna sáıkes, Mınıstrlik ekologıalyq týrızmdi damytý boıynsha jumys júrgizip jatyr. Osyǵan baılanysty, jurtshylyqtyń pikirin eskere otyryp, josparlar ázirlendi. Ulttyq parkter janynan qoǵamdyq keńester quryldy. Almaty oblysynyń 4 iri ulttyq parki boıynsha ınvestorlar anyqtaldy.
«Almaty óńiriniń ulttyq parkteri boıynsha 11 zamanaýı vızıt-ortalyq, 5 eko-qonaq úı, 28 glempıng, 8 Kempıng, 4 etno-aýyl jáne t.b. mekemeler salý kózdelip otyr. Bul jalpy alǵanda 31,5 mlrd. teńge jeke ınvestısıalardy tartady. Ulttyq parkterdiń rekreasıalyq júktemesiniń normalaryn eskere otyryp, týrıserdiń kútiletin aǵyny 2 mln.adamdy quraıdy. Qazirgi ýaqytta 3 Ulttyq parkte qajetti ınfraqurylymnyń qurylysy bastaldy. «İle-Alataý» ulttyq parkinde «Aıýsaı» vızıt-ortalyǵy ashyldy. Vızıt-ortalyqtyń aınalasynda soqpaqtar jaılastyryldy, týrıserge yńǵaıly bolý úshin ózen arqyly kópir salyndy, volonterler eko-Mádenıet boıynsha oqytý júrgizýde», - dedi Maǵzum Myrzaǵalıev.