Komısıaǵa 681 usynys túsken.
Olardy jergilikti onomastıkalyq komısıalardyń qaraýyna ákimdikterge jiberý týraly sheshim qabyldandy, dep habarlaıdy Almaty-akshamy.kz
Respýblıkalyq onomastıka komısıasynyń otyrysy ótip, qorytyndysy boıynsha Ońtústik Qazaqstan pedagogıkalyq ýnıversıtetine kórnekti memleket jáne qoǵam qaıratkeri, ǵalym-etnograf, tarıhshy, akademık Ózbekáli Jánibekovtiń esimin berý týraly sheshim qabyldandy.
Kezdesýde Qazaqstannyń óńirlerindegi 18 oqý ornyn jáne Kókshetaý, Qosshy, Stepnogorsk (Aqmola oblysy) Arys (Túrkistan oblysy) jáne Taldyqorǵan (Jetisý oblysy) qalalaryndaǵy 69 kósheni qaıta ataý máselesi talqylandy.
"Ataýlardyń bir bóligi qaıta qaraýǵa baǵyttalǵan. Bul «Gúlder», «Asý», «Tirshilik» jáne «Aınalaıyn». Otyrysqa qatysýshylar kóshe ataýlary óńirdiń tarıhı jáne geografıalyq erekshelikterin kórsetip, naqty maǵynaǵa ıe bolýy kerek degen pikirge keldi. Jaqynda Ulttyq quryltaıdyń II otyrysynda Qasym-Jomart Toqaev ómirbaıany bireýdiń jeke múddesi men qalaýy úshin maqsatty túrde mıfologıalanǵan keńestik kezeńdegi qaıratkerlerdiń esimderin túrli nysanǵa berý tájirıbesin toqtatýdy aıtty. Prezıdent onomastıka salasynda tártip ornatýdy jáne óńirlik erekshelikterdi de, jalpyulttyq basymdyqtardy da eskere otyryp, barlyq rásimdi reglamentteýdi tapsyrǵan edi. Dál osy maqsatta Mádenıet jáne sport mınıstrligi kórnekti qaıratkerler men tarıhı tulǵalardyń «Tarıhı tulǵalar» tizimin ózektendirý boıynsha jumys júrgizýde, sonyń negizinde nysandar men kóshelerge jańa ataýlar beriledi", - dedi Mádenıet jáne sport mınıstri Asqat Oralov.
Atap aıtqanda:
Aqtaý qalasyndaǵy №28 jalpy bilim beretin mektepke Uly aǵartýshy, ǵalym, aqyn jáne pýblısıs Ahmet Baıtursynulynyń esimi berildi. «Ult ustazynyń» esimimen Qostanaı aýdanynyń bilim bóliminiń memlekettik tilde oqytatyn Zarechnaıa jalpy bilim beretin mektebi, sondaı-aq Jetisý oblysy Alakól aýdanynyń Úsharal qalasynyń №1 orta mektebi atalady.
Qostanaı aýdanynyń bilim bóliminiń Sovhoz jalpy bilim beretin mektep ataýy kórnekti jazýshy, aqyn jáne qoǵam qaıratkeri Spandıar Kóbeevtiń qurmetine ózgertiledi.
Jetisý oblysy Alakól aýdany Úsharal qalasynyń №2 orta mektebi qazaq ádebıetiniń klassıgi, aqyn, jazýshy, dramatýrg jáne jýrnalıs İlıas Jansúgirovtiń esimimen atalady.
Jetisý oblysy Alakól aýdany Beskól stansıasynyń № 14 orta mektebi ataýy álemge áıgili qazaq jazýshysy Muhtar Áýezovtiń qurmetine ózgertiledi.
Jetisý oblysy Alakól aýdany Dostyq kentiniń № 11 orta mektebi Keńes Odaǵynyń Batyry jáne maıdanger-jazýshy Baýyrjan Momyshulynyń esimimen atalady.
Jetisý oblysyndaǵy Úsharal qazaq gımnazıasyna uly aǵartýshy jáne pedagog Ybyraı Altynsarınniń esimi beriledi.
Ideologıalyq turǵyda eskirgen, qaıtalanatyn ataýlary bar kósheler men basqa da oryndarǵa kelcek, Kókshetaý qalasynda «Revolúsıa úshin kúreskerlerge arnalǵan saıabaq» «Alash arystary» dep ózgertilip, Dmıtrıev kóshesi aty ańyzǵa aınalǵan Dáýletkereı kúıshiniń qurmetine ózgertiledi.
Aqmola oblysynyń Qosshy qalasyndaǵy 20-shy shaǵyn aýdannyń birneshe kóshesine Ámire Qashaýbaev, Jahansha Dosmuhamedov, Nurǵısa Tilendıev, Jumeken Nájimedenov, Roza Baǵlanova, Shoqyr Bóltekuly, Saǵadat Nurmaǵambetov, Ábish Kekilbaev, Farıza Ońǵarsynova, Batyrhan Shókenov sıaqty qaıratker tulǵalardyń esimderi berildi.
Stepnogorsk qalasynda Parkovaıa jáne Stepnaıa kósheleri aty ańyzǵa aınalǵan palýan Qajymuqan men Keńes Odaǵynyń Batyry Mánshúk Mámetovanyń qurmetine ózgertiledi.
Taldyqorǵan qalasynyń birneshe kóshesine qazaq handyǵynyń negizin qalaýshy Kereı men Jánibek handardyń, Tumanbaı Moldaǵalıev, Saǵadat Nurmaǵanbetov sıaqty tulǵalardyń esimderi berildi.
Túrkistan oblysynyń Arys qalasynda Roza Baǵlanovanyń, Qazaqstannyń Halyq jazýshysy Sherhan Murtazanyń jáne ártúrli geografıalyq oryndardyń: Sharyn, Saryarqa, Ulytaý, Jıdebaı, Saraıshyq jáne t. b. atyndaǵy kósheler paıda bolady.
Mádenıet komıtetine ádistemelik usynymdarǵa qajet ózgerister engizý jóninde tapsyrmalar beriledi.