Bıznesti qoldaýdyń aımaqtyq baǵdarlamasy iske qosylmaq
Qaraǵandyda QR Premer-Mınıstriniń orynbasary Eraly Toǵjanovtyń tóraǵalyǵymen Halyqtyń tabysyn 2025 jylǵa deıin arttyrý baǵdarlamasyn iske asyrý boıynsha keńes ótti. Oǵan ortalyq memlekettik organdardyń, damý ınstıtýttarynyń, iri ónerkásiptik kásiporyndardyń, shaǵyn jáne orta bıznestiń ókilderi qatysty, dep habarlaıdy Almaty-akshamy.kz Inform.kz-ke silteme jasap.
- Baǵdarlama eń aldymen halyqtyń tabysyn arttyrýǵa jáne nátıjeli jumyspen qamtamasyz etýge baǵyttalǵan. Jalpy, óńdeý ónerkásibinde 126 myńnan astam jańa jumys ornyn qurýmen 713 joba iske asyrylatyn bolady. 50 iri kásiporynnyń aınalasynda shaǵyn jáne orta bıznes beldeýleri qurylady, bul kásipkerlik sýbektileriniń kiristerin arttyrýǵa, taýarlardy kepildi ótkizýge, ónimdilikti arttyrýǵa múmkindik beredi, - dedi Eraly Toǵjanov.
Otyrys barysynda Indýstrıa jáne ınfraqurylymdyq damý vıse-mınıstri Marat Qarabaev árbir baǵyt boıynsha tolyǵyraq baıandady. Onyń aıtýynsha, jyl basynan beri birqatar iri kompanıa men ónerkásiptik kásiporyndar jumysshylardyń jalaqysyn orta eseppen 20%-ǵa arttyrdy.
2022 jyly respýblıkada 165 ınvestısıalyq jobany iske asyrý esebinen 16,3 myń jańa jumys ornyn qurý josparlanýda. Jumyspen qamtý kórsetkishiniń eń kóp ósimi Qaraǵandy, Shyǵys Qazaqstan jáne Pavlodar oblystarynda bolady dep kútilýde. Aýyldyq jerlerde 2025 jylǵa deıin 52,4 myń, monoqalalarda 11,1 myń jańa jumys ornyn qurý josparlanýda. Mysaly, Saran qalasynda baǵdarlama sheńberinde alty jobany iske qosý esebinen shamamen 2,5 myń jumys orny ashylady. Monoqalada avtobýstar men júk kólikteri, shınalar óndirýden basqa, ınvestorlar turmystyq tehnıka shyǵarýǵa nıetti.
Boljam boıynsha, elimizde metalýrg, tehnolog, hımık, operator, mashınıst jáne t.b. mamandyqtar boıynsha 75 myńnan astam jańa jáne joǵary bilikti jumys oryndary paıda bolady. Ónerkásipti damytý qory óńdeý ónerkásibiniń jobalaryn jeńildikti sharttarmen: SHOB úshin - 10 jylǵa deıingi merzimge 3% mólsherleme boıynsha; kásiporyndardyń barlyq túrleri úshin - 20 jylǵa deıingi merzimge 7% mólsherleme boıynsha qarjylandyratyn bolady. Keńeste sondaı-aq óńirlik kiristerdi arttyrý baǵdarlamalary da sóz boldy.
Qaraǵandy oblysy ákiminiń orynbasary Ermek Alpysovtyń aıtýynsha, iri kompanıalardyń aınalasynda 637 shaǵyn jáne orta bıznes kásiporyndarynyń beldeýi qurylǵan. Óńirde 46 ınvestısıalyq joba júzege asyrylýda, áleýmettik kásipkerlik damýda. Bıznesti qoldaýdyń aımaqtyq baǵdarlamasyn iske qosý josparlanýda. Jańa kásipter atlasy ázirlenýde, bul kadrlar máselesin sheshýge múmkindik beredi. Keńes qorytyndysy boıynsha E.Toǵjanov birqatar tapsyrmalar berdi. Árbir iri kásiporynnyń óńir halqynyń tabysyn arttyrýǵa áserin baǵalaý ındıkatorlaryn aıqyndaý qajet. Joǵary qaıta óńdelgen taýarlar óndiretin jáne ımportty almastyrýdy qamtamasyz etetin kásiporyndar úshin yntalandyrýlar engiziletin bolady.
Óz kezeginde, memlekettik qoldaýǵa jaýap retinde kásiporyndar qarsy mindettemeler alýy tıis. Vıse-premer baǵdarlamany iske asyrý turaqty baqylaýda ekenin atap ótti. Jobalyq keńse aıasynda monıtorıń aı saıyn júrgiziledi.