Shveısarıamen yntymaqtastyq artýda
Qazaqstan men Shveısarıa arasyndaǵy yntymaqtastyq memorandýmyna qol qoıyldy, dep habarlaıdy Almaty-akshamy.kz Qazaqtv.com saıtyna silteme jasap.
Áriptestik nyǵaıýda. Qazaqstan Respýblıkasynyń Tuńǵysh Prezıdenti – Elbasy kitaphanasynyń delegasıasy Jenevalyq saıasat pen qaýipsizdik ortalyǵy jáne Jenevadaǵy BUU bólimi kitaphanasy men muraǵaty basshylarymen kezdesti. Atalmysh is-shara barysynda jahandyq jáne aımaqtyq qaýipsizdik máseleleri jóninde birlesken jobalardy júzege asyrý boıynsha yntymaqtastyq memorandýmyna, sondaı-aq arnaýly hatqa qol qoıyldy.
Bul qujat muraǵat, tarıh salalaryndaǵy kópjaqty, halyqaralyq qarym-qatynastar men qundylyqtardy zertteýdiń yntymaqtastyǵyn, BUU qyzmeti men Qazaqstannyń tarıhı murasyn zertteýdegi seriktestikti kózdeıdi.
Aıta keteıik, Shveısarıada ótken arnaýly is-shara Semeı ıadrolyq polıgonynyń jabylýyna 30 jyl tolýyna oraı uıymdastyryldy.
«BUU kitaphanasy – óz bastaýyn Ulttar lıgasynan alǵan biregeı mekeme. Munda BUU-nyń ıadrolyq qarýǵa qarsy áreketin qamtyp kórsetetin muraǵattyq qujattar jınalǵan. Bul – Qazaqstan jáne Elbasy kitaphanasynyń da mańyzdy bir baǵyty, óıtkeni Tuńǵysh Prezıdentimizdiń tarıhı murasynyń bir bóligi sanalady. BUU jáne Tuńǵysh Prezıdentimizdiń kitaphanalary arasynda birlesken jobalardy júzege asyrý jáne aqparat, kitap, basylym, muraǵattyq qujat almasý boıynsha ortaq tustary kóp», - dedi Qazaqstan Respýblıkasynyń Tuńǵysh Prezıdenti – Elbasy kitaphanasynyń dırektory Baqytjan Temirbolat.
Jenevadaǵy BUU bólimi kitaphanasy men muraǵatynyń dırektory Franchesko Pızano Qazaqstan BUU-nyń beldi múshesi ekenin aıtty.
«Qazaqstan BUU-nyń beldi múshesi ekenin bilemiz. Iadrolyq qarýsyzdaný, halyqaralyq yntymaqtastyq pen kópjaqty qarym-qatynastarǵa zor kóńil bóletin el. Sondyqtan yntymaqtastyq memorandýmyna qol qoıǵanymyzdy joǵary baǵalap otyrmyz. Qazaqstan men Jenevadaǵy BUU keńsesi arasynda taǵy bir myqty baılanys bar. Qazaqstan Prezıdenti Qasym-Jomart Toqaev osy bólimniń bas dırektory bolǵan. Onyń qol astynda jumys istedim, jaqsy tanımyn. Munda atqarǵan eńbegine óte rızamyn», - dedi Franchesko Pızano.