Ákimdikterdiń grantyna qujat qabyldaý júrip jatyr.
Jergilikti atqarýshy organdardyń bilim berý granttaryna qujat qabyldaý 10 tamyzda bastaldy, dep habarlaıdy Almaty-akshamy.kz Baq.kz-ke silteme jasap.
Ótinishterdi joǵary oqý oryndarynyń qabyldaý komısıalary qaraıdy. Qujattardy qabyldaý merzimi týraly aqparatty ákimdikten nemese olardyń resmı saıtynan alýǵa bolady.
Jyl saıyn mamandardy maqsatty daıarlaýǵa jergilikti atqarýshy organdardyń (ákimdikterdiń) búdjetinen bilim berý granttary bólinedi. Ákimdikterdiń granttary konkýrstyq negizde taǵaıyndalady. Bul rette halyqtyń áleýmettik osal toptaryna jatatyn talapkerlerge erekshe kóńil bólinedi.
Elimiz boıynsha jergilikti atqarýshy organdar 3 myńǵa jýyq grant bóldi. Negizinen, ákimdikterge pedagogter, medısına qyzmetkerleri jáne aýyl sharýashylyq salasynyń mamandary qajet. Bıyl elorda ákimdigi bakalavrıat deńgeıi boıynsha mamandardy daıarlaýǵa eń kóp tapsyrys berdi. Nur-Sultan qalasynyń ákimdigi pedagogıkalyq jáne medısınalyq mamandyqtar úshin 1200-ge jýyq grant bóldi. Shyǵys Qazaqstan oblysy Abaı oblysymen birlesip 450 grant, Aqmola oblysy 229 grant taǵaıyndady.
Ult ustazy Ahmet Baıtursynulynyń 150 jyldyǵyn toılaýǵa oraı Qostanaı oblysynyń ákimdigi A.Baıtursynov atyndaǵy Qostanaı óńirlik ýnıversıtetinde oqýǵa 15 grant bóldi. Óner salasynyń mamandaryn daıarlaýǵa tek Soltústik Qazaqstan oblysynyń ákimdigi grant bólip otyr, olar jergilikti búdjet esebinen 15 maman oqytýǵa daıyn.
Shymkent qalasy men Túrkistan oblysynyń ákimdikteri bıyl bakalavrıatta mamandardy oqytýǵa tapsyrys jasamaǵan. Almaty qalasy jáne Pavlodar oblysynyń ákimdikteri óńirdiń joǵary oqý ornynan keıingi medısınalyq bilimi bar mamandardy daıarlaýǵa qajettiligin eskere otyryp, oblystyq búdjet qarajatynan tek magıstratýra men rezıdentýranyń bilim berý baǵdarlamalary boıynsha granttar bóledi.
Bilim berý grantyn taǵaıyndaý konkýrsyna qatysý úshin úmitker joǵary oqý ornynyń qabyldaý komısıasyna kelesi qujattardy tapsyrady: bilimi týraly qujat; UBT sertıfıkaty; jeke basyn kýálandyratyn qujattyń kóshirmesi; jeńildik sanatyn rastaıtyn qujattar.
Grantty taǵaıyndaý týraly sheshimdi ákimdik janynan qurylǵan arnaıy komısıa qabyldaıdy. Joǵary oqý oryndaryna qabyldaý 25 tamyzǵa deıin júzege asyrylady.