Olımpıada chempıony Olga Rypakova kásibı mansabyn resmı túrde aıaqtady
Olımpıada chempıony ári kúmis jáne qola júldegeri, qazaqstandyq jeńil atlet Olga Rypakova kásibı mansabyn resmı túrde aıaqtady, dep habarlaıdy Almaty-akshamy.kz.
Qazaqstan jeńil atletıka federasıasynan málim etkenindeı, ataqty atlet bul týraly Astanada jeńil atletıkadan ótken jabyq keshendegi H Azıa chempıonatynda habarlady.
«Elime rızamyn! Prezıdent pen sport jetekshilerinen bastap meniń eń jas jankúıerlerime deıin bir ǵana, biraq óte mańyzdy nárse – maǵan degen senimderi úshin alǵys aıtamyn. Meni tulǵa retinde, kásibı sportshy retinde tanytýǵa múmkindik bergen taǵdyrǵa jáne Qudaıǵa alǵys aıtamyn»,- dedi O.Rypakova.
Otandyq sporttyń damýyna úlken úles qosqany úshin QR Premer-Mınıstri sportshyǵa alǵys hat joldady.
«Sizdiń jarqyn jeńisterińiz qazaqstandyq jankúıerlerdiń júreginde máńgi qalady. Biz sizdiń sportqa jáne prınsıpterge degen adaldyǵyńyzdy baǵalaımyz. El boıynsha myńdaǵan bala sizden úlgi alady jáne otandyq jeńil atletıka dástúrin jalǵastyrady. Otandyq sportty damytýǵa qosqan úlesińiz úshin zor alǵysymyzdy bildiremiz. Qurmetpen, QR Premer-Mınıstri Álıhan Smaıylov», - delingen alǵys hatta.
Saltanat sońynda sportshy jankúıerler aldynda qurmet sheńberin júgirip ótti.