Elimizde ómirlik derekter men naqty mysaldarǵa toly taǵy bir týyndy jaryqqa shyqty.
Áskerı jáne memleket qaıratkeri, general-maıor Erlik Serikbaıuly Taıjanovtyń ómirine negizdelgen «Elge qyzmet – basty mindet» atty shyǵarmashylyq eńbek dúnıege keldi.
Jıyrmasynda mıllıoner, otyzynda mınıstr atanǵan myna zamanda jetistikke jetý, baqyttyń kiltin tabý taqyrybynda oqyrmandy tańqaldyrý ońaı emes. Solaı desek te, bul kitap kóptegen adamdar úshin júregine jaqyn bolatyny sózsiz. Óıtkeni, ańyz ben oıdan quralǵan ádisterge emes, naqty ómirlik mysaldarǵa toly. Oqyrman bas keıipkerdiń ómirimen tanysý barysynda naǵyz kúres, shynaıy eńbekke qanyq bolady.
Qarapaıym aýyldyń balasy eńbek jolyn Soltústik Qazaqstan oblysy, Maıbalyq aýylynda mehanızator bolyp bastaǵan. Arman qýyp Qaraǵandy qalasyndaǵy joǵary mılısıa mektebine attanady. Oqýǵa birden túspeı, sharýashylyq bóliminde qara jumysqa jegiledi. Qurylys jumystarymen aınalysady, arnaıy oqý ornynyń otymen kirip kúlimen shyǵady. Nátıjesinde ózi armandaǵan oqý ornynyń kýrsanty atanady. Oqýyn oıdaǵydaı aıaqtap, arnaıy organdarda alǵashqy eńbek jolyn bastaıdy. Qyryq jyl qylmys ataýlysymen kúresip, halyqtyń tynyshtyǵyn qamtamasyz etedi. Qazaqstan Respýblıkasy Ulttyq qaýipsizdik organdarynda qyzmet atqaryp, joǵary laýazymdarǵa jaýapty mindetterdi oryndaıdy. Eń joǵary áskerı shen – generalǵa deıin qol jetti. Qurmetti eńbek demalysyna shyqsa da jastardy patrıotızm rýhynda tárbıeleý jumysynan qol úzgen emes. Qazaqstan boıynsha «Shıto-rú Karate» qoǵamdyq birlestiginiń tóraǵasy retinde jastardy salaýatty ómir saltyn ustanýǵa, Otan qorǵaýshy azamat bolýǵa baýlyp keledi.
E.Taıjanov 2021 jyly QR Parlamenti Májilisiniń depýtaty atandy. Halyq qalaýlysy retinde qoǵamdaǵy ótkir máselelerdi kóterdi, halyqtyń áleýmettik máselelerin sheshýge, qıyndyq týǵanda el tireýi bolýǵa tyrysty.
Atalmysh kitapta adamnyń tulǵalyq damýy men ósýi týraly kóptegen mysaldar keltirilgen.
«QR UQK organdarynyń ardagerleri» respýblıkalyq qoǵamdyq birlestiginiń tóraǵasy,
QR UQK qurmetti qyzmetkeri, polkovnık
Kenjebolat Beknazarov