Elena 9 eıs jasap, 8 breık-poınttyń beseýin múlt jibergen joq
Qazaqstannyń birinshi, álemniń 4-raketkasy Elena Rybakına Rolan Garros týrnıriniń ekinshi aınalymyna shyqty, dep habarlaıdy Almaty-akshamy.kz QazAqparatqa silteme jasap.
Qazaqstandyq tenısshi alǵashqy aınalymda dúnıejúzilik reıtıńte 146-orynda turǵan chehıalyq 16 jasar Brenda Frýhvırtovamen kezdesti.
Birinshi partıada esep 3:3 bolǵan mezette chehıalyq sportshy breıkpen alǵa shyqqanymen, Elena kópke uzatpady. Sodan keıin taǵy bir breıkpen setti támamdady – 6:4.
Brenda Frýhvırtova ekinshi partıada da breık jasaǵanymen E.Rybakına tarazy basyn qaıta teńestirip, óz geımin de aldy – 3:2. Aqyry machty kezekti breıkpen túıindedi – 6:2
Bir saǵat 17 mınýtqa sozylǵan báseke barysynda Elena 9 eıs jasap, 8 breık-poınttyń beseýin múlt jibergen joq. Qarsylasy 2 breıkpen (7 breık-poınt) shekteldi.
Elena Rybakına ekinshi aınalymda Chehıanyń taǵy bir jas juldyzy, álemniń 50-raketkasy, 18 jastaǵy Lında Noskovamen sheberlik baıqasady.
Ol reıtıńte 68-satydaǵy chernogorıalyq Danka Kovınıchti joldan taıdyrdy. Lında birinshi partıada 6:3 esebimen basym tústi.
Ekinshi sette esep 2:1 bolǵanda, qarsylasy jaraqatyna baılanysty oıyndy jalǵastyra almady.
Eske sala keteıik, budan buryn Iýlıa Pýtınsevanyń Rolan Garros týrnıriniń ekinshi aınalymyna shyqqanyn jazǵan bolatynbyz. Al Aleksandr Býblık Rolan Garros týrnırinde jeńilip qaldy.
Sondaı-aq Rolan Garrostyń alǵashqy aınalymynda jeńiske jetken Iýlıa Pýtınsevadan suhbat alǵan edik.