Qazaqstandyqtardyń kóbi elektrli samokattaryn satyp jatyr.
Osy saladaǵy sarapshy mamandar buny tártipti qatańdatýmen baılanystyryp otyr. Bıyl sáýir men mamyr aralyǵynda jeńil kólik quraldarynyń dúkenderdegi saýdasy 23 paıyzǵa tómendegen, dep habarlaıdy Almaty-akshamy.kz
2 apta buryn májilis elektr samokattardyń qozǵalysyn retteıtin jańa tártipti qabylady. Endi jańashyldyqty Senat maquldasa, trotýarlar arqyly samokat ıeleri 6 km/saǵat jyldamdyqpen ǵana júre alatyn bolady. Al kólik aǵynymen ilesý úshin arnaıy shlem men jaryq shaǵylystyratyn kıim kıý mindetteledi. Taǵy júrgizýshi kýáligi de bolý talap etiledi.
24.kz aqparatyna júginsek, jelmen jarysa júıitkeıtin samokatshylardy tártipke keltiretin jańashyldyq túrtki boldy ma belgisiz, áıteýir sarapshylar onlaın jarnama servısterinde osy kólik túriniń satylyp kóbeıgenin ańǵarǵan. Taýar quny da 5%-ǵa qymbattapty. Sý jańa elektrosamokattyń ortasha baǵasy 140 myń teńge turady. Qoldan alsańyz 30 myńǵa arzan shyǵady. Biraq, taýarǵa degen suranys tómen deıdi sarapshylar.
«Bunyń basty sebebi – jańa zań jobasy dep esepteımin. Sebebi, kóptegen adamdar elektr samokattarǵa qatysty jańalyqty BAQ betterinen oqyp alyp, jańashyldyq kúshine endi dep oılaýda. Sondyqtan olar bul kólik túrin paıdalanýdyń tıimdiligi joq degen pikir qalyptastyrǵan», - deıdi sarapshy Ánýar Júsipov.
Al karsherıngtik kompanıanyń negizin qalaýshy Meırambek Ábilqasov buǵan jańa zań jobasynyń túk qatysy joq degen oıda. Onyń aıtýynsha, halyq jalǵa alý ádetine kóshe bastaǵan.
«Qazir siz 300-400 dollarǵa bir ózińiz ǵana miný úshin elektro samokat alasyz. Ony árdaıym qýattap otyrý qajet. Saqtaıtyn oryn kerek. Synyp qalsa, jóndeýge qosymsha aqsha qajet. Al ýaqytsha jalǵa alatyn bolsańyz bunyń barlyǵyna bas qatyrmaıtyn bolasyz», - deıdi Karsherıngtik kompanıanyń negizin qalaýshyMeırambek Ábilqasov.
Qazir elektro samokattar naryǵynda iri 4 kompanıa jumys isteıdi. Endi bul bıznes jańa tártipke baǵyna ma degen oryndy suraq týyndaıdy.
«Meniń oıymsha bul zań osy kólik túrin paıdalanýǵa tyıym salýǵa baǵyttalǵan. Jańa tártiptiń saldarynan bıznes biraz zardap shegedi. Al sherıngke keler bolsaq, bul naryq Qazaqstanda jabylady dep oılaımyn. Sebebi, 1 myńnan astam adam jumyssyz qalady. Iaǵnı, osy samokattardy paıdalanatyn kýrerler arzan kólikten qaǵylady. Sondyqtan Senat bul zań jobasyn muqıat zerttep, eshkim zardap shekpeıtindeı sheshim qabyldaýy tıis», - deıdi sarapshy Ánýar Júsipov.
Aıta ketken jón, qazir Parlament qabyrǵasynda jyldamdyǵy saǵatyna 50 km-den asatyn elektro samokattardyń elge ákelýge tyıym salý men shekteý jaǵy qarastyrylýda. Demek, bul naryqta aldaǵy ýaqytta túbegeıli ózgerister bolady.