Endi Ata Zańǵa ózgerister engizilgende Parlament bekite salmaıdy
Memleket basshysy Qasym-Jomart Toqaev Qazaqstan halqy Assambleıasynyń sesıasynda Konstıtýsıaǵa ózgerister engizý jóninde referendým ótkizýdi usyndy. Bul óte quptarlyq jaǵdaı. Óıtkeni, referendým ár azamatqa el taǵdyryn sheshýge tikeleı qatysýǵa múmkindik beredi.
Máselen Shvesarıada qandaı da bir zań qabyldanbasyn, basym kópshiligi halyqtyń qalaýymen, kóptiń tileýimen sheshiledi eken. Jergilikti halyq zańdar men konstıtýsıaǵa qatysty túzetýlerge de tikeleı aralasa alady. Al bizde she? Bizde osy ýaqytqa deıin Ata Zańdy Parlament, depýtattar «bir aýyzdan» maquldap ózgerte salatyn edi. Halyqtyń pikirimen eshkim sanasqan joq. Endi Memleket basshysy bulaı jalǵasa berýge bolmaıtynyn aıtyp otyr. Ata Zańǵa engiziletin ózgerister halyq tańdaýymen júzege asatyn boldy. Bul óte durys sheshim. Sebebi, memleket taǵdyryn bıliktegi jekelegen azamattar emes, tutas halyqtyń ózi sheshýi kerek. Sonda ǵana Jańa Qazaqstandy qura alatyn bolamyz.
Bir qýanarlyǵy, endi Ata Zańǵa ózgerister engizilgende Parlament bekite salmaıdy, halyqpen sanasady, referendým qorytyndysymen júzege asady. Bul ádil Qazaqstan qurýdyń kepili bolatyny sózsiz. Halyqtyń úni, pikiri eskerilgen kezde qoǵamda ádildik ornaıdy. Sondyqtan bul ózgerister el bolashaǵyna aıryqsha áser etedi.