Nursultan Nazarbaev Nur Otan partıasynyń Tóraǵasy ókilettigin tapsyrý týraly sheshim qabyldady.
Búgin Elbasy N.Á.Nazarbaevtyń «Nur Otan» partıasy Saıası keńesiniń keńeıtilgen otyrysyndaǵy sóz sóıledi, dep habarlaıdy Almaty-akshamy.kz Nur Otan partıasynyń baspasóz qyzmetine silteme jasap.
Tómende Elbasynyń sóılegen sóziniń tolyq mátinin usynamyz.
Qurmetti partıalastar!
Qadirli qazaqstandyqtar!
Osy jyldar ishinde qalyptasqan kóppartıalyq júıe eldigimizdiń tiregine aınaldy.
Bul oraıda «Nur Otan» partıasynyń saıası salmaǵy basym ekeni anyq.
Biz elimizdiń partıalyq-saıası júıesin birtindep ári jan-jaqty saralaı otyryp damyttyq.
Barlyq bastamalarymyz sıaqty bul máselege de ishki daıyndyqpen keldik.
Júıesiz reformalar halyqtyń demokratıaǵa degen senimin joǵaltyp, túrli shıelenister týdyrǵan jáne terıtorıadan aıyrǵan jaǵdaılar tarıhta az emes.
Táýelsizdikti saqtaý jáne memlekettilikti nyǵaıtý – bizdiń bolashaq urpaq aldyndaǵy paryzymyz.
Sondyqtan «Nur Otan» partıasy turaqtylyq pen tatýlyqqa, áleýmettik-ekonomıkalyq pragmatızmge, ornyqty damýǵa negizdelgen jáne tutas qoǵamnyń múddesine saı keletin saıasat júrgizýde.
Qurmetti otandastar!
Biz Táýelsizdiktiń otyz jyldyǵyn aıtýly jetistiktermen qarsy alyp otyrmyz.
Qýatty elge aınalyp, birligi bekem qoǵam qurdyq.
Syndarly saıasat júrgizip, áleýeti zor naryqtyq ekonomıkalyq júıe qalyptastyrdyq.
Eń bastysy babalarymyz ǵasyrlar boıy ańsap ótken Táýelsizdikke qol jetkizip, eldigimiz qaıta jańǵyrdy.
Álem qartasynda Qazaqstan degen egemen eldiń oıyp turyp oryn alýy úshin aıanbaı eńbek ettik.
Endigi kezekte osy jetistigimizdi eselep arttyrý el yntymaǵy men tutastyǵyna baılanysty.
Otyz jylda 9,5 mıllıonnan astam sábı dúnıege keldi.
Olardyń aldyńǵy shebi orda buzar otyzǵa tolyp otyr.
Bul – kózi ashyq, kókiregi oıaý, sanasy azat, oıy ozyq jańa býyn.
Memlekettilikti saqtap, Qazaqstandy «Máńgilik El» etý osy urpaqqa júkteletin tarıhı mısıa dep sanaımyn.
Osy oraıda jańa dáýirdegi qazaqstandyqtarǵa baǵdar bolatyn «Eldiktiń jeti tuǵyry» atty qaǵıdattar jıyntyǵyn usynamyn.
Bul – otyz jyldyq belesti elmen birge ótkergen Elbasy retindegi meniń jas urpaqqa joldar úndeýim dep qabyldańyzdar.
Birinshi. Táýelsizdik – kez-kelgen azamat úshin eń qasterli qundylyq.
Tamyry tereń tarıhymyzǵa qurmetpen qarap, memlekettiligimizdi qadirleý, ony kózdiń qarashyǵyndaı qorǵaý – árbir qazaqstandyqtyń mindeti.
Jer júzinde óz aldyna derbestigi joq qansha ult pen ulystyń baryn eskersek, eseli eńbekke arnalǵan otyz jyl ult tarıhynda altyn árippen jazylary anyq.
Álemde kólemi jaǵynan 9-shy oryn alatyn baıtaq atyrapty enshileý Jaratqannyń halqymyzǵa bergen baǵa jetpes nesibesi dep bilemiz.
Qazaqtyń barsha arman-maqsatynyń oryndalýy tek Táýelsiz memleket, derbes ult jaǵdaıynda ǵana múmkin ekenin umytpaýymyz kerek.
Táýelsizdikti nyǵaıtý – ekonomıkany nyǵaıtý.
Bul barsha halyqtyń eńbegimen keledi.
Sondyqtan jas urpaq el ıgiligi úshin árdaıym eńbek etýge daıyn bolýy qajet.
Ekinshi. Birlik pen kelisim – eldigimizdiń myzǵymas tuǵyry.
Etnıkalyq áralýandyq – birtutas ult retinde qalyptasqan halqymyzdyń artyqshylyǵy.
Búginde birlik pen etnosaralyq tatýlyqty saqtaý jolynda otyz jyl boıy júrgizgen syndarly saıasattyń jemisin kórip otyrmyz.
Bir shańyraqtyń astynda tatý-tátti ǵumyr keship, tatýlyq pen syılastyqty qamtamasyz etýde Qazaqstan halqy Assambleıasynyń áleýeti zor.
Konstıtýsıany qasterleý, memlekettik tildi bilý, ulttyq qundylyqtardy qadirleý – ár azamattyń paryzy.
Birligimizdi arttyryp, yntymaǵymyzdy kúsheıtsek qana eldigimiz nyǵaıyp, egemendigimiz baıandy bolady.
Úshinshi. Jer – ata-baba murasy, halyq qazynasy.
Jerden qasıetti eshnárse joq.
Qazaq úshin el men jer – tutas uǵym.
Tarıhymyzdaǵy soǵys ataýlynyń bári el men jerdi qorǵaý úshin bolǵan.
Biz Táýelsizdikti jarıalaı salysymen shekaramyzdy qujat júzinde bekitip alýǵa kúsh jumsadyq.
Adamzat tarıhynda, tipti qazirgi kezeńde de daýly terıtorıanyń soǵysqa, qantógiske alyp kelgenin kórip otyrmyz (Taýly Qarabaq, Qyrym, Grýzıa jáne t.b.).
Men óskeleń urpaqty osyndaı qaýipten saqtap qalý úshin barymdy saldym.
Endi ata-baba amanatyna adal bolyp, ulan-ǵaıyr jerimizdi qorǵaý, ony bolashaq urpaqqa mıras etý – bizdiń ortaq boryshymyz.
Tórtinshi. Otbasy men salt-dástúr – qoǵamnyń altyn dińgegi.
Otanǵa degen súıispenshilik – óz otbasyńa, aýyl-aımaǵyńa, elińe degen mahabbat pen janashyrlyqtan bastalady.
Otbasy – urpaq tárbıesiniń ustahanasy, qoǵamdyq qatynastardyń bastaýy sanalatyn biregeı ınstıtýt.
Jahandaný úderisi turmysymyz ben salt-sanamyzǵa ózgeris ákelgenmen, ǵasyrlar boıy qalyptasqan qundylyqtardan bas tartýǵa bolmaıdy.
Qaı kezeńde de biz úlkenge – izet, kishige – qurmet kórsetýdi dáripteıtin ata dástúrimizdi berik ustanýymyz qajet.
Otbasy ınstıtýty álsirep, salt-dástúrimiz umytylsa, el bolyp qalýymyz ekitalaı.
Sol úshin dástúrdiń ozyǵyn alyp, tozyǵyn tastap, eldik bolmystyń ózegin saqtaı bilýimiz kerek.
Sonda ǵana sanaly urpaq tárbıeleımiz.
Besinshi. Ulttyq mádenıet – halyqtyń rýhanı tiregi.
Biz – tamyry tereńnen bastaý alatyn uly kóshpendilerdiń urpaǵymyz.
Bolmysy erekshe, rýhanı-mádenı muralarǵa baı halyqpyz.
Qazirgi tańda jahandyq básekege qabiletti bolý úshin biregeı ulttyq minez, asqaq rýh kerek.
Mundaı qasıetter tarıhty bilý, mádenı qundylyqtardy taný arqyly keledi.
Órkenıetti otyz eldiń qataryna qosylýda materıaldyq qundylyqtarmen qatar, rýhanı baılyqtyń mańyzy zor.
Sol úshin mádenıetimizdi zerdelep, ózge jurtqa nasıhattaı bilgen abzal.
Basqa halyqtardy tek óner qudiretimen, ǵylymı izdenispen ǵana moıyndata alamyz.
Altynshy. Bilim men eńbek – baqýatty ómirdiń kilti.
«Ózińe sen, ózińdi alyp shyǵar, eńbegiń men aqylyń eki jaqtap» dep dana Abaı aıtqandaı, biz tek óz bilimimiz ben kúshimizge senýimiz kerek.
Elimizde talantty ári daryndy, alǵyr da ójet jastar jeterlik.
Álemniń alpaýyt kompanıalarynda jumys isteıtin, halyqaralyq deńgeıde ǵylymı jańalyq ashqan, túrli salada eńbegimen tanylyp júrgen jalyndy jastardy kórgende erekshe qýanamyn.
Bul – bizdiń úmitimizdiń aqtalǵany.
Men jalpyǵa ortaq eńbek qoǵamyn qurý týraly ıdeıamda onyń bes prınsıpin – evolúsıalyq damý, ortaq jaýapkershilik, ózara seriktestik, yntalandyrý men kásibılikke umtylýdy atap kórsettim.
Onsyz kez kelgen qoǵam kóshtiń sońynda qalýy múmkin.
Endeshe tabystyń kilti úzdiksiz bilim alý men tynymsyz eńbek etýde.
Adal eńbek qana adamdy muratyna jetkizedi.
Osyny jastardyń sanasyna sińirý qajet.
Jetinshi. Pragmatızm – básekege qabiletti bolýdyń kepili.
Biz qolda bar resýrs pen múmkindikti paıdalanýǵa, nátıjeli jumys atqarýǵa jáne kózdegen maqsatqa tıimdi qol jetkizýge tyrysýymyz kerek.
Qazir elimizde jastardyń ózin-ózi damytýyna, bilimin jetildirip, súıikti isimen aınalysýyna múmkindik mol.
Sondyqtan pragmatızm prınsıpteri boıynsha barynsha qanaǵatshyl, únemshil, ustamdy bolyp, ýaqytty oryndy paıdalanýǵa talpynǵan jón.
Osylaısha biz Táýelsizdigimizdi baıandy etip, el tutastyǵyn saqtap, otbasylyq qundylyqtardy jańǵyrtyp, ult mádenıetin nasıhattap, tereń bilim men adal eńbekke den qoıǵan jasampaz el bolamyz.
Eldiktiń jeti tuǵyry degenimiz – osy!
Ardaqty aǵaıyn!
Aldaǵy 30 jyl – eldigimizdi nyǵaıtýdyń jańa kezeńi bolary haq.
Ol ár azamat ultymyzdyń bolashaǵy úshin jaýapkershilikti óz moınyna alyp, ony tolyq sezine bilgen kezde júzege asady.
Eldiń eń iri saıası partıasy retinde «Nur Otan» osy baǵytta atqarylar isterdiń aldyńǵy shebinde bolýy kerek.
Osyndaı ıgi jumystyń basy-qasynda júrý – bıleýshi partıanyń uzaqmerzimdi kóshbasshylyǵynyń kepili.
Endigi kezekte osy mereıli kúnge jetkizgen, yrysymyzdy arttyrǵan Jaratqanǵa shúkirshilik etip, erteńge senimdi qadam basý qajet.
Rýhymyzdy qaırap, eńsemizdi tiktep, budan da bıik asýlarǵa jetý úshin jáne Táýelsiz Qazaqstannyń jarqyn bolashaǵy jolynda tynbaı jumys isteýge tıispiz!
Biz kez kelgen synaqtan súrinbeı ótip, jeńiske birge jetemiz!
Táýelsizdigimizdiń otyz jyldyq belesi qutty bolsyn!
Biz birgemiz!