2020 jyldan beri el boıynsha qıyndyqqa tap bolǵan 17 myń azamatqa jańa qujat berilgen.
Mamandardyń aıtýynsha, bul iste zańgerler men ońaltaý ortalyqtarynyń kómegi orasan zor. Sebebi adamdar kóbine qujatyn ne joǵaltyp alady, ne urlatyp alatyn kórinedi, dep habarlaıdy Almaty-akshamy.kz 24.kz-ke silteme jasap.
Anastasıa Bogdanova 24 jyl boıy tólqujatsyz ómir súrip keledi. Osydan 18 jyl buryn anasymen birge Reseıden kóship kelgen. Anasy qujattaryn joǵaltyp alǵan. Endi qujatsyz júrýdiń ábden qıyndyǵyn kórgen basynan ótken jaǵdaıymen bólisti,
«Týý týraly kýáligim boldy. Ony anam men ógeı ákem ishimdikke salynǵanda joǵaltty. Mektep bitirgennen keıin oqýǵa túsý armanym edi. Tólqujat bolmaǵan soń, meni qabyldamady. Jumysqa turaıyn desem, onda da jeke basty rastaıtyn kálikti suraıdy. Nápaqamdy taýyp, úsh baýyrymdy asyraý úshin qara jumysshy boldym. Kelisimshartsyz jumys istedim. Odan balam dúnıege keldi. Onyń da qujaty joq. Jaqynda ólim men ómir arasynda boldym. Dárigerdi shaqyrtyp, em alaıyn desek, qujatsyz qabyldamaıtynyn aıtady», - deıdi Anastasıa Bogdanova.
Anastasıa Bogdanovanyń aıtýynsha, tólqujatsyz ómir – ómir emes. Ol jýyrda aspaz bolyp, aıyna 50 myń teńge tabamyn dep qala shetindegi aýylǵa barady. Alaıda mal baǵyp, qara jumys istegen. Qurǵaq ýádege sengen janǵa eńbekaqy da tólenbegen. Barar jer, basar taýy bolmaǵan soń, amalsyz bes aı zańsyz eńbekke kóngen.
Ońaltý ortalyǵyna sharasyz kúıge túsken azamattar kómek surap barady. Mamandardyń aıtýynsha, 100 adamnyń 10%-y qujat máselesimen júginedi.
«Bizge tek Qazaqstannyń azamaty emes, basqa shet memlekettiń azamattar da keledi ǵoı. Olardyń qujattaryna júginý úshin, elshilikterge birge baramyz. Nastányń jaǵdaıy kishkene qıyn bolyp jatyr. Aqyryn-aqyryn sheship jatyrmyz», - deıdi «Qorǵaý Astana» qorynyń áleýmettik qyzmetkeri Gúljan Kısıkova.
Sońǵy kezderi ońaltý ortalyǵyna otyzǵa jaqyndap qalǵan jastar da jıi baratyn bolypty. Kóbiniń tólqujaty joq. Aralarynda eńbek quldyǵynyń qurbandary da kezdesedi eken.
«Osydan birer jyl buryn tek qyzyl tólqujatpen júrgen adamdar keletin. Qazir jastar da bar. Mundaı qıyn jaǵdaıǵa túsetinder – balalar úıinen shyqqan jandar. Kúnde jantúrshigerlik oqıǵalardy estımiz. Máselen, keshe ǵana 2 jyl buryn úńgirde ómir súrip jatqan azamattarǵa járdem berdik. Mine, qazir olardyń qujattaryn jasaýǵa kiristik», - deıdi «Qorǵaý Astana» qorynyń tóraǵasy Anna Ryl.
«Áýeli quqyq qorǵaý organyna, ıaǵnı kóshi-qon qyzmetine barý qajet. Eger shetel azamaty bolsa, elshilikke baryp, resmı suranys jiberý kerek. Ádette anasynyń tólqujaty bolmasa, balaǵa da qujat berilmeıdi. Eger anasy qaıtys bolsa, onda qujatty jasatý qıyn. Ońaltý ortalyǵynan nemese zańgerden kómek suraǵan jón. Bul - uzaq proses», - deıdi zańger Mahabbat Qasenova.