Júrgizýshi kýáligin alýǵa qatysty talaptar kúsheıgenimen, qujatty zańsyz satatyndar azaımaı tur.
Tipti sheteldikterge qazaqstandyq qujattyń jalǵan nusqasyn usynatyn arnaıy saıt iske qosylǵan. El arasynda «Spesson» atalyp ketken arnaıy Halyqqa qyzmet kórsetý ortalyqtary aldynda ashyqtan-ashyq saýda júrgizip kelgen deldaldar endi áleýmettik jelige kóshken. Júrgizýshi kýáligin jańadan alýshyǵa da, tipti kólik tizgindeý quqyǵynan aıyrylǵandarǵa da kómektesemiz degen habarlandyrýdan kóz súrinedi. Úsh kún ishinde eshbir emtıhansyz, tipti kezekke turmaı-aq jasap beremiz dep jurtty qyzyqtyrǵandar da jeterlik, dep habarlaıdy Almaty-akshamy.kz Qazaqstan.tv-ǵa silteme jasap.
Reseı azamattary úshin qazaqstandyq kýálikti usynatyn arnaıy saıtty da kózimiz shaldy. Qyzmet quny – 29 500 rúbl, ıaǵnı 180 myń teńge shamasynda. «Qujatty túpnusqadan aınytpaı, sapaly jasaımyz» degen jarnamasy da bar. Tıisti anketany toltyryp, foto joldasańyz kóp uzamaı habarlasýy tıis.
Júrgizýshi kýáliginiń baǵasy ár qalada ártúrli. 80 myńnan bastap jarty mln-ǵa deıin barady. Zańsyzdyqqa Halyqqa qyzmet kórsetý ortalyǵy mamandarynyń da qatysy bar. Antıkor qyzmeti sońǵy úsh jylda 60 myńdaı derekti anyqtap, 18 qylmystyq is qozǵaǵan. İshki ister mınıstrligi qujatty zańsyz saýdalaǵandar da, ony satyp alǵandar da jaýapqa tartylady dep eskertti. Aıyppul tólep qana qoımaı, bas bostandyǵynan aıyrylýy múmkin.
«Jasaǵan adamǵa eki jylǵa bas bostandyǵynan aıyrý qarastyrylsa, jalǵan qujatty paıdalanǵan adamdarǵa 40 táýlikke deıin qamaqqa alynady. Qazirgi tańda áleýmettik jelide tarap jatqan jarnamalardyń kóbisi jalǵan aqparat bolyp keledi. Iaǵnı, qazirgi tańda tarap jatqan alaıaqtyqtyń bir túri», - deıdi QR İİM Tergeý departamentiniń Asa mańyzdy ister jónindegi aǵa anyqtaýshysy Jeńis Jaqsylyqov.
Al Júrgizýshiler odaǵynyń ókilderi mundaı qylmystyń tamyryna balta shabý úshin eń aldymen kýálikti zańsyz jolmen alýshylar nege kóp degen suraqtyń astaryna úńilý kerek deıdi. Avtomektepte oqýdyń mindettelmeýi, emtıhan suraqtarynyń qoljetimsizdigi jemqorlyqqa túrtki bolǵan. Odan qaldy synaq tapsyrýǵa arnalǵan kólikter jetispeıdi. Bar bolǵannyń ózinde qaıta-qaıta isten shyǵady.
Júrgizýshi kýáligin kim kóringenniń satyp ala berýi - úlken qaýipke aparatyn jaǵdaı. Avtomektepke barmaǵan, qarapaıym jol erejesinen beıhabar adamnyń kesirinen talaı otbasy qara jamylýy múmkin. Elde ár úsh saǵat saıyn jol apatynan bir adam qaıtys bolatynyn eskersek, bul – búginginiń ózekti máselesi.