Elde jańa jyl túni tynysh ótti

Jańa jyldy toılaý kezinde ishki ister organdarynyń qyzmetkerleri qoǵamdyq qaýipsizdik pen azamattardyń tynyshtyǵyn qamtamasyz etý maqsatynda kúsheıtilgen rejımde qyzmet atqardy,- dep habarlaıdy Aqshamnews.kz.

Jalpy jańa jyl túni kósheler men qoǵamdyq oryndarda aýyr jáne asa aýyr qylmystarǵa jol berilgen joq. 31 jeltoqsan tańynan 1 qańtar tańy aralyǵynda polısıanyń 102 jedel baılanys púltine 11 448 ótinish tústi, onyń ishinde 3 082-si túngi ýaqytta kelip túsken. Qońyraýlardyń basym bóligi anyqtamalyq sıpatta boldy. Azamattar petardalardy paıdalaný máseleleri boıynsha habarlasyp, muz aıdyndary men jańa jyldyq shyrshalardyń qaıda ornalasqanyn naqtylady, syrǵanaqtarda adasyp qalǵandar týraly, sondaı-aq aýlalarda durys qoıylmaǵan avtokólikter men shyǵýǵa kedergi keltirgen jaǵdaılar jóninde habarlady. Túsken barlyq ótinishterge polısıa qyzmetkerleri ýaqtyly áreket etip, qoldanystaǵy zańnama aıasynda qajetti sharalardy qabyldady. Qabyldanǵan sharalar men polısıanyń úılesimdi jumysynyń arqasynda merekelik is-sharalar tynysh ótti. Kósheler men qoǵamdyq oryndarda zań men tártip tolyq kólemde qamtamasyz etildi.