QR Prezıdentiniń farmasevtıka salasyndaǵy otandyq óndiristiń úlesin 50%-ǵa jetkizý jónindegi tapsyrmalaryn oryndaý sheńberinde Qazaqstanda iri strategıalyq ınvestısıalyq joba júzege asyrylady. Tıisti qaýlyǵa Premer-mınıstr Oljas Bektenov qol qoıdy.
Qujatta QR Densaýlyq saqtaý mınıstrligi men «Khan Tengri Biopharma» JSHS arasyndaǵy «Alataý» arnaıy ekonomıkalyq aımaǵynda zamanaýı «Bıofarmasevtıkalyq tolyq sıkldi keshen salý» jónindegi ınvestısıalar týraly kelisim jobasy maquldandy.
Nysan dárilik zattar óndirisiniń ozyq tehnologıalarymen jabdyqtalady dep josparlanýda. Negizgi maqsat – 58 preparat túrin shyǵaratyn óndiris qýatyn qurý. Tolyq sıkldi iske qosýǵa, onyń ishinde belsendi farmasevtıkalyq ıngredıentter óndirýge erekshe nazar aýdarylady.
Keshenniń óndiristik portfeline 27 halyqaralyq patenttelmegen ataýy bar, sonyń ishinde onkologıalyq, aýtoımmýndy, sırek jáne qabyný aýrýlaryn emdeýge arnalǵan preparattar kiredi.
Investısıalardyń jalpy kólemi 103 mlrd teńgeden asady. Keshende 180-nen astam jańa turaqty jumys orny ashylady.
Jobany júzege asyrý elimizdiń farmasevtıka salasyn damytýda strategıalyq mańyzǵa ıe jáne lokalızasıany keńeıtýge, ornyqty óndiristik bazany qalyptastyrýǵa, sondaı-aq áleýmettik mańyzy bar preparattardyń ımportyn kezeń-kezeńimen almastyrýǵa baǵyttalǵan. Odan bólek, shyǵarylatyn ónimniń bir bóligin EAEO, TMD elderiniń, sondaı-aq Taıaý Shyǵys memleketteriniń naryqtaryna eksporttaý josparlanyp otyr.