Elbasy Nursultan Nazarbaev Jambyl oblysyndaǵy áleýmettik-mádenı nysandarǵa bardy.
Qazaqstannyń Tuńǵysh Prezıdenti aldymen Jambyl oblysynyń ákimi B.Saparbaevpen kezdesti, dep habarlaıdy Almaty-akshamy.kz QazAqparat saıtyna silteme jasap.
Kezdesýde Elbasyǵa áskerı qoımadaǵy jarylystan zardap shekken Baızaq aýdany turǵyndaryna kómek kórsetý sharalary jáne qalpyna keltirý jumystary týraly málimet berildi. Jambyl oblysynyń ákimi Elbasyǵa óńirdiń áleýmettik-ekologıalyq damýy, Nur Otan partıasynyń saılaýaldy baǵdarlamasynyń júzege asyrylý barysy jaıly, sondaı-aq agrarlyq sektordaǵy máselelerdi sheshýge jáne halyqty jumyspen qamtýǵa baǵyttalǵan sharalar týraly baıandady.
Qazaqstannyń Tuńǵysh Prezıdenti óńir basshylyǵynyń jumysyna oń baǵa berdi. Kezdesýden keıin Elbasy «Áljan ana» tarıhı mýzeıiniń qyzmetimen tanysyp, mekeme aýmaǵyna aǵash otyrǵyzý rásimine qatysty.
Qazaqstannyń Tuńǵysh Prezıdenti sondaı-aq aýyldaǵy Mádenıet úıine bardy. Bul Mádenıet úıinde kitaphana jáne túrli úıirmeler jumys isteıdi, 250 oryndyq konsert zaly bar. N.Nazarbaev Jambyl oblystyq fılarmonıasynyń artıseri men aýdandyq Mádenıet úıiniń shákirtteri oryndaǵan mýzykalyq shyǵarmalardy tyńdady.
Elbasy sondaı-aq sporttyq-saýyqtyrý kesheniniń jumys barysymen tanysty. Atalǵan keshende aýqymdy arena, ámbebap zal jáne kúres pen boksqa arnalǵan zal bar. Búginde sporttyq-saýyqtyrý kesheninde tórt júzden astam bala men jetkinshek sporttyń erkin kúres, taekvondo, karate, voleıbol, fýtbol, boks syndy alty túri boıynsha jattyǵady.