Tórt óńirde halyqtyń shyǵysy kirisinen joǵary.
Qazaqstandyqtardyń shyǵyndary jan basyna shaqqanda ortasha eseppen alǵanda 225,3 myń teńge. Bul – halyqtyń ortasha tabysynyń 94,6%-y, dep habarlaıdy Almaty-akshamy.kz.
Shyǵys kiristen asyp túsetin tórt óńir bar: Almaty qalasy (10,6%-ǵa), sondaı-aq Almaty (10%-ǵa), Jetisý (9,9%-ǵa) jáne Túrkistan (5,4%-ǵa) oblystary.
Halyq shyǵynynyń 51,4%-y nemese 115,8 myń teńgesi birden eń qajetti azyq-túlik taýarlaryna baǵyttaldy. Al elimizdiń tórt óńirinde – Mańǵystaý, Almaty, Túrkistan jáne Jambyl oblystarynda azyq-túlikke jumsalǵan qarajat shyǵystardyń 60%-dan astamyn quraıdy.
Bul oblystarda turǵyn úımen qamtý kórsetkishi de tómen. 2021 jyldyń qorytyndysy boıynsha tizimdi Jambyl, Túrkistan jáne Almaty (qazirgi ýaqytta Almaty jáne Jetisýǵa bólingen) oblystary bastaıdy.
Bul óńirlerdiń turǵyndary úshin, sondaı-aq, negizinen, salystyrmaly túrde tabysy tómen barlyq qazaqstandyq úshin turǵyn úı máselesin sheshýdiń ýaqyt synynan ótken nusqasy – turǵyn úı jınaqtary júıesi.
Sonymen qatar jalaqysy tómen qazaqstandyqtar komersıalyq bankterdiń standartty ıpotekalyq baǵdarlamalaryn ala almaıdy: nesıelik qarajat bankterdiń mólsherlemelerin esepke alǵanda tym qymbatqa túsedi. Turǵyn úı qurylysy jınaqtary tabysy tómen bolsa da júıeli túrde qarajat jınaýǵa, sodan keıin qolaıly mólsherleme boıynsha nesıe alýǵa kómektesedi. Bul qural qazir barlyǵyna derlik qoljetimdi.