Ulttyq ulannyń mindeti - qoǵamdyq tártipti qamtamasyz etý, memlekettik nysandardyń qaýipsizdigi, qarýly qaqtyǵystardy boldyrmaý.
Osyndaı mańyzdy jumystardy atqaratyn úsh birdeı áskerı bólim Qaraǵandy oblysynda ornalasqan. Sonyń biri - Qazaqstandaǵy eń iri 6505 áskerı bólimi. Ondaǵy sarbazdar aıdaýyl qyzmetimen qatar túzetý mekemelerin kúzetedi. Osy ýaqyt aralyǵynda áskerı bólimnen erligimen kózge túsken talaı sarbaz shyqqan, dep habarlaıdy Almaty-akshamy.kz 24.kz-ke silteme jasap.
6505 áskerı bólimindegi ár sarbazdyń saýlyǵy, olarǵa qatysty zańdy talaptardyń saqtalýyna tikeleı Aqylbek Qońyrov jaýapty. Qurylǵanyna 66 jyl bolǵan eń iri bólimniń 3 oblysta áskerı quramy bar. Bas-aıaǵy bir myńǵa jýyq sarbaz azamattyq boryshyn ótep júr. Maman olardyń barlyǵyna qamalǵandardy kúzetý, olardy sotqa aparý kezindegi aıdaýyl jumysynyń qyr-syryn úıretedi. Aqylbek úshinshi dárejeli «Aıbyn» ordenimen marapattalǵan.
Qurylǵanyna 56 jyl bolǵan 5451 áskerı bólimi de Qaraǵandyda ornalasqan. Munda 800-den astam sarbaz bar. Olardyń mindeti - qoǵamdyq qaýipsizdikti qamtamasyz etý. Mysaly, tek ótken jyly áskerı bólim sarbazdary 60-qa jýyq qylmysker men qoǵamdyq tártipti buzǵandardy ustaǵan. Onyń 17-si - qylmystyq jaýapkershilikten jaltarmaq bolǵandar.
«Sarbazdar kóbinese ózderiniń batyldyqtaryn, qyzmet atqarý kezinde qyraǵylyqtaryn kórsetedi. Bir jaǵdaıdy aıtyp ketetin bolsam, esirtkini tasymaldaý kezinde, zakladchık deıdi ǵoı, sony jumys kezinde ustap aldy. Ol aǵashtardyń arasyna tyǵyp, fotoǵa túsirip jatqan sol jerdi, sol kezde jasaq ustap aldy», - deıdi Ulttyq ulannyń 5451 áskerı bólimi komandıriniń tárbıe jáne áleýmettik jumystar jónindegi orynbasary Arman Syzdyqov.
Atap ótken jón, qos áskerı bólimniń sarbazdary da osydan bir jyl buryn qańtar oqıǵasy kezinde qoǵamdyq tártipti saqtaýǵa óz úlesin qosqan. 31 jyl boıy ulttyq ulan sarbazdary bas bostandyǵynan aıyrylǵandardy kúzetip, qoǵamdaǵy tártipti qadaǵalap keledi. Beıbit kúnde erligimen kózge túsken áskerılerdiń erligi sarbazdarǵa erlik sabaqtarynda úlgi retinde oqytylady.