Bul týraly Qasym-Jomart Toqaev VIII saılanǵan Qazaqstan Respýblıkasy Parlamentiniń birinshi sesıasynda aıtty.
Memleket basshysy Úkimet pen Parlamentke geologıalyq barlaý jáne kenishterdi ıgerý isine ınvestısıa tartyp, salaǵa qatysty naqty sharalar ázirleýdi tapsyrdy, dep habarlaıdy Almaty-akshamy.kz.
«Elimizdiń óndiristik áleýetin barynsha arttyrý mańyzdy. Qazaqstan ekonomıkasy áli kúnge deıin paıdaly qazbalarǵa táýeldi bolyp otyr, ıaǵnı el ekonomıkasynyń qurylymy qarapaıym. Shyn máninde, bizge qarqyndy damý úshin kúrdeli, ártarapty ekonomıkalyq qurylym qajet. Árıne, shıkizat naryǵyndaǵy álemdik básekede bizdiń óz artyqshylyǵymyz bar. Qazirgi jáne strategıalyq mindetterdi oryndaý úshin ony tıimdi paıdalaný qajet. Sondyqtan, osy salany odan ári damyta berý kerek», - dedi Qasym-Jomart Toqaev Parlamenttiń VIII shaqyrylymynyń birinshi sesıasynda.
«Biraq, jer qoınaýyn paıdalaný salasynda ondaǵan jyl boıy qordalanǵan problemalar az emes. Geologıalyq barlaý jumystarynyń oıdaǵydaı júrgizilmeýi taý-ken ónerkásibin órkendetýge kedergi keltirip otyr. Mıneraldy shıkizat bazasyn tolyqtyrý qarqyny báseńdep barady. Onyń ústine, qazir ıgerilip jatqan ken oryndarynyń qory sarqyla bastady», - deıdi Prezıdent.
Sondaı-aq, Memleket basshysy qazba baılyqty tıimdi jáne únemdi paıdalaný qajettigin aıtty.
«Ol úshin zańnamany jaqsartyp, rásimderdi jeńildetý kerek. Geologıalyq barlaý jáne kenishterdi ıgerý isine ınvestısıa tartý aıryqsha mańyzdy. Úkimet pen Parlament osy salaǵa qatysty naqty sharalar ázirleýi tıis», - dedi Qasym-Jomart Toqaev.