Bilim berý júıesi ult sapasyn jaqsartýda mańyzdy ról atqarady
Memleket basshysy Qasym-Jomart Toqaev 1 qyrkúıekte ótken Qazaqstan Parlamenti Palatalarynyń birlesken otyrysynda jarıalaǵan «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda bilim berý júıesine aıryqsha mán berdi. Prezıdentimiz tujyrymdaǵandaı, bul sala ult sapasyn jaqsartý isinde asa mańyzdy ról atqarady. Osy salanyń ókili bolǵandyqtan bul baǵdar bizge de úlken jaýapkershilik júkteıdi.
Halqymyzdaǵy «El bolamyn deseń, besigińdi túze» degen taǵylymdy qaǵıdatqa júgingen Prezıdent tabysty ult bolýdyń mańyzdy sharty bilim berý júıesiniń sapasyna tikeleı baılanysty ekenine toqtaldy. Sondyqtan da jastardyń bilim alyp, jan-jaqty damýy úshin qolaıly jaǵdaı jasalýǵa tıis. Joldaýda Memleket basshysy osy máseleni mańyzdy ulttyq joba deńgeıinde qarastyrdy. «Bilimdi jáne birneshe tildi meńgergen urpaq bolashaqqa senimmen qadam basady. Bizdiń kúshimiz – jastardyń biliminde»,– dedi. Onyń aıtýynsha, «kásibılik pen eńbekqorlyq qoǵamymyzda eń joǵary orynda turýy kerek. Elimizde eńbekqor adam, kásibı maman eń syıly adam bolýǵa tıis. Osyndaı azamattar memleketimizdi damytady».
Prezıdent bıyl biz jańa kezeńge qadam basqanymyzdy, halqymyz jalpyulttyq referendýmda saıası jańǵyrý baǵdaryn qoldaǵanyn qadap aıtty. Rasynda da, kúni keshe ǵana elimizde ótkizilgen Konstıtýsıalyq reforma Jańa, Ádiletti Qazaqstandy qurý jolyndaǵy asa mańyzdy qadam boldy. Basty maqsattardyń biri – halqymyzdyń ál-aýqatynyń sapaly jáne ınklúzıvti ósýin qamtamasyz etý. Joǵary bilim salasynyń reformalaryn osy baǵdarda júrgizgen abzal. Memleket basshysy atap ótkendeı, otandyq joǵary oqý oryndarynda bilim alýǵa jyldyq ósimi 2-3 paıyz bolatyn jeńildetilgen nesıe berilmek. Bul sharalar joǵary bilimniń qoljetimdiligin arttyryp qana qoımaı, qoǵamda áriptestik pen ózara jaýapkershilik qaǵıdatyn nyǵaıta túspek.
Stýdentterge, ǵylym, densaýlyq saqtaý, óndiris, IT salalarynyń bilikti mamandaryna túrli jeńildikter berilip, qoldaý kórsetiletini osy salalarda oryn alǵan túrli ózekti máselelerdi sheshýge kómektesedi. Máselen, qaı óńirde, qaı qalada bolmasyn, búginde ata-analardy da, stýdent-jastardy da tolǵandyratyn negizgi qajettiliktiń biri – kópten beri sheshimin tappaı kele jatqan jataqhana máselesi edi. Prezıdent óz Joldaýynda osy túıtkildi sheshýdiń naqty joldaryn kórsetti.
– Kelesi mańyzdy másele – stýdentterdi jataqhanamen qamtamasyz etý. Bul túıtkildi sheshý úshin joǵary oqý oryndarymen jáne qurylys kompanıalarymen memlekettik-jekemenshik seriktestik ornatý tásilin barynsha engizý kerek. Sondaı-aq, barlyq máseleniń sheshimin tabýdy memlekettiń moınyna ilý durys emes dep sanaımyn. Sol sebepti, memleketten qarajat alý úshin jekemenshik joǵary oqý oryndarynyń jataqhanasy bolýy shart. Árıne, muny oqý oryndarynan birtindep talap etken jón. Stýdentterdiń jekelegen, áleýmettik turǵydan az qamtylǵan sanattary úshin páter jaldaýǵa ketetin shyǵynyn sýbsıdıalaý múmkindigin de qarastyrýǵa bolady. Joǵary oqý oryndary janyndaǵy endaýment-qorlar bilim berý ekojúıesin damytýdyń negizgi býynyna aınalýǵa tıis. Suranysqa ıe bolyp otyrǵan jáne joǵary bilikti mamandardyń tapshylyǵyn azaıtý qajet. Ǵylym, densaýlyq saqtaý, óndiris, IT salalarynyń bilikti mamandaryna jeńildik jasalady, – dep tujyrymdaǵan Qasym-Jomart Toqaev kásibılik pen eńbekqorlyq qoǵamymyzda eń joǵary orynda turýy qajettigin atap ótti. Qandaı kásippen aınalyssań da, ony sapaly atqarý mańyzdy. Jastar naqty bir mamandyqtyń qyr-syryn jetik bilýge umtylǵany jón. Óz salasynyń sheberine árdaıym suranys bolady. Óskeleń urpaq Qazaqstanda ǵana emes, ózge elderde básekege qabiletti bolýy kerek.