Mundaı tyıymnyń engizilýine elde qyzylsha dertiniń dendep turǵany sebep.
Bul týraly Qazaqstannyń bas sanıtarlyq dárigeri Aıjan Esmaǵambetova otandyq basylymdardyń birine bergen suhbatynda málim etti, dep habarlaıdy Almaty-akshamy.kz.
Bas sanıtardyń sózinshe, mundaı tyıymdy engizý máselesiniń kóterilýine elimizde qyzylsha dertiniń asqynýy sebep.
Naýryzda Qazaqstanda qyzylshanyń 70-ten astam jaǵdaıy zerthanamen rastaldy. Ásirese, Almatyda ahýal kúrdeli. Munda jyl basynan beri qyzylshamen 46 naýqas aýyrdy. Naýqas balalardyń jartysynyń ata-analary ekpeden bas tartqan.
Elimizdiń bas sanıtarlyq dárigeriniń aıtýynsha, balabaqsha tobyndaǵy balalardyń 90%-y vaksınasıalanýy kerek. Eger ekpe almaǵandardyń sany 10%-dan kóp bolsa, onda olardyń kelýine tyıym salý máselesi qarastyrylady.
"Densaýlyq saqtaý mınıstrliginiń buıryqtarynyń birinde norma bar. Balabaqshalarda vaksınasıalanbaǵan balalardyń sany 10 %-dan aspaýy kerek. Jergilikti sanıtarlyq-epıdemıologıalyq baqylaý departamentterine osyny anyqtaýǵa monıtorıń júrgizýdi tapsyrdyq. Eger norma saqtalmasa, vaksınasıalanbaǵan balalardy balabaqshalarǵa jiberýdi toqtatamyz. Muny ózimiz aýyrmas úshin jáne basqalarǵa juqtyrmas úshin jasaımyz. Basqa jol joq. Bul – zań normasy, ortaq jaýapkershilik. Naýqastardyń sany óse beredi, biz balalardy qorǵaýymyz kerek", – deıdi Aıjan Esmaǵambetova.