Olar muny sońǵy 2-3 jylda baıqaǵan.
Qazaqstandyq ekologtar sońǵy 2-3 jylda transshekaralyq ózender sýynyń azaıyp kele jatqany baıqalatynyn aıtyp otyr, dep habarlaıdy Almaty-akshamy.kz QazAqparatqa silteme jasap.
«Transshekaralyq ózendermen sýdyń az aǵyp kelýin sońǵy 2-3 jylda baıqap otyrmyz. Eń aldymen, bul - tabıǵı qubylys. Qazirgi ýaqytta álemdegi problema klımattyń ózgerýi bolyp tur. Iaǵnı, kún jylynyp qurǵaqshylyq oryn alýda. Ekinshiden, ár memlekettiń turǵylyqty turǵyndarynyń damýy, ósýi bar. Soǵan oraı sýdy tutyný kólemi artyp keledi», - dedi QR Ekologıa, geologıa jáne tabıǵı resýrstar mınıstrligi Transshekaralyq ózender departamentiniń dırektory Arsen Jaqanbaev.
Osy rette ol Reseıden keletin Jaıyq ózeni sýynyń sońǵy 2-3 jylda azaıyp ketýi elimizdiń batys óńirine zardabyn tıgizip otyrǵanyn aıtty.
«Reseı tarapymen birneshe kelissóz júrgizgen edik. Olar sýdy eń aldymen óz qajetine paıdalanady. Biz sýdyń tómengi saǵasynda otyrǵandyqtan, olar paıdalanǵannan qalǵan sýdy qoldanamyz. Jalpy, ár memleketpen transshekaralyq ózendi paıdalanýǵa qatysty kelisim bar. Máselen, Reseımen 2013 jyly bekitilgen kelisim bar. Sol kelisimniń aıasynda ár ózen boıynsha 6 jumys toby qurylǵan. Aıtalyq, Jaıyq pen Tobyl ózeni 1996 jylǵy hattamamen retteledi. Sol qujatqa sáıkes, sý az, ortasha jáne kóp jyldary ózimizge kerekti sý mólsherin alamyz. Biraq, Jaıyq ózeniniń ózindik sıpattamasy bar. Jaıyqtyń sýy az sıkli óte uzaq bolady. Ol 5-6 jylǵa sozylýy múmkin. Sonyń saldary bizdiń ekologıamyzǵa tıedi», - dedi Arsen Jaqanbaev.