Qazirgi zamanda qoqys – tek turmystyq qaldyq emes, qaıta óńdelip, paıdaly ónimge aınalatyn qundy resýrs. Ekologıalyq mádenıetti bala kezden qalyptastyrý – bolashaq urpaqtyń tabıǵatqa degen jaýapkershiligin arttyrady.
Almaty qalasyndaǵy №202 mektep-gımnazıanyń 2 «Á» synyp oqýshylary qoqysty qaıta óńdeýdiń mańyzdylyǵyn shyǵarmashylyq jolmen kórsetti. Olar turmystyq qaldyqtardy múmkindiginshe qaıta óńdep, túrli buıymdar jasap shyqty.
Kórmege qoıylǵan buıymdardyń árqaısysy – balalar qıaly men eńbeginiń nátıjesi. Biri áýe shary, biri samaýryn, tipti kıiz úı, úı janýarlary, ydys-aıaq, ósimdikter men úıge qajetti jabdyqtarǵa deıin jasaǵan. Ár týyndy tek estetıkalyq mánge ıe emes, sonymen qatar ekologıalyq oı salady.
Synyp jetekshisi Gúlfaırýs Nurlybekqyzynyń aıtýynsha, bul sharaǵa balalar óz erkimen, erekshe qyzyǵýshylyqpen qatysqan.
«Sharanyń basty maqsaty – oqýshylardyń ekologıalyq saýatyn arttyrý, aınalany taza ustaýǵa baýlý jáne «Taza Qazaqstan» aksıasyna qoldaý kórsetý», – deıdi ustaz.
Mekteptiń bastaýysh synyptar kafedrasynyń jetekshisi Aınur Toqtasynqyzy da jas sheberlerdiń eńbegine joǵary baǵa berip, olardyń shyǵarmashylyǵy men oılaý qabiletine tánti bolǵanyn jetkizdi.
«Keıbir buıymdar adam oıyna kele bermeıtin erekshe ıdeıalarmen jasalǵan», – dep atap ótti ol.
Ekologıalyq mádenıetti bala jasynan qalyptastyrý – bolashaq urpaqtyń sanaly azamat bolyp ósýine negiz bolady. Bul oraıda Ernazar Shahnaz esimdi oqýshynyń pikiri oı salady:
«Men ózim turatyn qalany árdaıym taza kúıinde kórgim keledi. Ol úshin jaýapkershilikti ár adam ózinen bastaýy kerek. Mysaly, sý ishseń – bótelkesin qoqys jáshigine tasta, kámpıt jeseń – qaǵazyn jerge tastama. Bárimiz osy ádetti ustansaq, qalada shashylǵan qoqys bolmas edi», – deıdi ol.
Kórmege oqýshylar daıyndaǵan 50-den astam buıym qoıyldy. Jas sheberler mektep basshylyǵy men kórermenderge óz jumysy týraly aıtyp, buıymdardy daıyndaý barysymen tanystyrdy.
Oqýshylardyń qarapaıym qoqystan ádemi ári paıdaly buıymdar jasaýy – shyǵarmashylyq pen ekologıalyq tárbıeniń keremet úılesimi. Mundaı sharalar balalardyń boıynda tabıǵatqa janashyrlyqpen qaraý, tazalyq saqtaý, ysyrapqa jol bermeý sekildi mańyzdy daǵdylardy qalyptastyrady.
Qaldyqty qaıta óńdeýge bolatyn dúnıe dep qabyldaý – tek kózqaras emes, úlken mádenıettiń kórinisi. Balalardyń boıynan osyndaı qasıettiń tabylyp jatqany, árıne, qýanarlyq jaıt