«Taza Qazaqstan» ekologıalyq aksıasy Almaty qalasynyń Túrksib aýdanynda kásipkerlerdiń qoldaýymen jalǵasyn tapty. «Alúr Avto» kompanıasy aýqymdy is-sharaǵa belsendi qoldaý kórsetip, óz aýmaǵynda tazalyq sharalaryn uıymdastyrdy. Sondaı-aq, barlyq kásipkerlerdi ıgi is-sharaǵa atsalysýǵa shaqyrdy.
Kompanıanyń ákimshilik-sharýashylyq qamtamasyz etý bóliminiń jetekshisi Baýyrjan Alpysbaevtyń aıtýynsha, bul shara bir rettik emes, turaqty túrde jalǵasyn tabady.
– Búgingi aksıa barysynda biz ózimizge tıesili aýmaqty qoqystan tazartyp, aıaldama keshenin jáne ǵımarattardyń qasbetin jýdyq. Sondaı-aq, jasyl jelekti kútip-baptaý jáne abattandyrý jumystary da júrgizilýde. Biz bul ekologıalyq bastamany qoldap, qalamyzdyń tazalyǵyna turaqty túrde úles qosýǵa daıynbyz. Barlyq kásipkerlerdi osy sharaǵa qatysyp, qalamyzdyń tazalyǵyn saqtaýǵa shaqyramyz, – deıdi Baýyrjan Alpysbaev.
Bul bastama Almaty qalasy ákimdiginiń abattandyrý pasportyna sáıkes júzege asyrylýda. Iaǵnı árbir shaǵyn jáne orta bıznes ókili óz aýmaǵyn taza ustaýǵa, jylyna keminde eki ret – kóktemde jáne kúzde senbilik uıymdastyrýǵa mindetti.
Túrksib aýdany ákiminiń apparatynyń kásipkerlikti jáne ónerkásipti damytý bóliminiń bas mamany Erdos Áýbákirovtiń aıtýynsha, mundaı is-sharalar aýdannyń sanıtarlyq jaǵdaıyn jaqsartyp qana qoımaı, qala turǵyndary men qonaqtary úshin qolaıly orta qalyptastyrýǵa da yqpal etedi.
– Kásipkerlerdiń osyndaı ekologıalyq bastamalarǵa belsene atsalysýy – qala ekologıasyn jaqsartýdyń mańyzdy qadamy. Aýdanymyzdaǵy árbir kásipker ózine tıesili aýmaqtyń tazalyǵyna jaýapkershilikpen qaraýy tıis. Bul – tek sanıtarlyq talap qana emes, sondaı-aq qala mádenıetiniń kórsetkishi, – deıdi Erdos Áýbákirov.
Búginde aksıa aıasynda qoqys shyǵarý, aýmaqty kógaldandyrý jáne sanıtarlyq tazartý jumystary belsendi túrde júrgizilýde. Uıymdastyrýshylar bul is-sharanyń turaqty túrde ótkizilip turatynyn atap ótti.