Ǵylymı zertteýler júrgizý qajet.
Qazaqstannyń Ekologıa, geologıa jáne tabıǵı resýrstar mınıstri Serikqalı Brekeshev búgingi Úkimet otyrysynda kıik popýlásıasyn basqarýǵa qatysty qandaı sheshimge kelgenderin málimdedi, dep habarlaıdy Almaty-akshamy.kz Baq.kz silteme jasap.
Mınıstr keshe ǵylym jáne salalyq assosıasıalardyń qatysýymen jınalys ótkizip, bir toqtamǵa kelgenderin aıtty.
«Tereń monıtorıń jáne tıimdi basqarý úshin Qazaqstandaǵy kıik popýlásıasy arealy ekojúıeni keshendi baǵalaý jóninde kúrdeli ǵylymı zertteýler júrgizý qajet. Bıyl Zoologıa ınstıtýty Ǵylym jáne joǵary bilim mınıstrligine 2022-2024 jyldarǵa arnalǵan baǵdarlamalyq-maqsatty qarjylandyrý aıasynda zertteýler júrgizý úshin ótinim bergen edi. Ókinishke qaraı, bul joba qabyldanbady. Osyǵan baılanysty, Ǵylym jáne joǵary bilim, Qarjy Mınıstrlikteri osy zertteýlerdi qarjylandyrýdy bıyldan bastap qarastyrý múmkindigin suraımyz», - dedi mınıstr.
Sonymen qatar ol atalǵan zertteýler qorytyndysyna deıin aýyl sharýashylyǵy sýbektilerine jabaıy janýarlar egis jerlerin zıan keltirgeni úshin, onyń ishinde zalaldy esepteý ádistemesin jáne qarjylandyrý tetigin ázirleý boıynsha ótemaqy máselesin qaraý qajettigin jetkizdi.
«ROP Operatorynyń qarajaty esebinen aýyl sharýashylyǵy tehnıkasyn jeńildikpen kredıtteý máselesine keletin bolsaq, Qaıyrbek Aıtbaıuly aıtqandaı tıisti jumys Indýstrıa jáne aýyl sharýashylyǵy mınıstrlikterimen birlesip atqarylýda», - dedi Brekeshev.