QR Ulttyq bankiniń tóraǵasy Erbolat Dosaev bankomattardyń jumysyn qamtamasyz etý boıynsha atqarylyp jatqan jumystar týraly málimet berdi, dep habarlaıdy Almaty-akshamy.kz QazAqparatqa silteme jasap.
Úkimet otyrysynda Ulttyq bank basshysy qarjylyq turaqtylyqty, ásirese, valúta naryǵyndaǵy qarjylyq turaqtylyqty qamtamasyz etý sharalary qalaı iske asatynyn aıtty.
«Qarjy júıesiniń turaqty jumysyn qamtamasyz etý maqsatynda Ulttyq Bank mynadaı shuǵyl sharalar qabyldady. Bıylǵy 7 qańtardan bastap búkil el boıynsha ekinshi deńgeıdegi bankterdiń onlaın servısterine kirý kezeń-kezeńimen qalpyna keltirildi. Búginnen bastap Almaty qalasy men Almaty oblysyn qosa alǵanda, bankterdi qolma-qol aqsha qarajatymen jáne qolma-qol aqsha berý úshin bankomattardyń jumysyn qamtamasyz etý boıynsha sharalar qabyldandy», - dedi Erbolat Dosaev.
Sonymen qatar, ol 10 qańtardan bastap qarjy sektory men memlekettik búdjettiń teńgedegi tólemderin júrgizý úshin Qazaqstan bankaralyq esep aıyrysý ortalyǵynyń tólem júıeleri shtattyq rejımde jumys isteı bastaǵanyn eske saldy.
«Bank júıesiniń ótimdiligin qoldaý maqsatynda Qazaqstan qor bırjasynda repo operasıalary arqyly teńgedegi ótimdilikti usyný operasıalary shekteýsiz kólemde júrgizilýde», - dedi Ulttyq bank tóraǵasy.