Búgin Úkimet otyrysynda Premer-Mınıstr Álıhan Smaıylov osylaı dedi.
Ári mundaı apat qaıtalanbas úshin elimizdegi barlyq energetıkalyq nysandarǵa tehnıkalyq aýdıt júrgizýdi tapsyrdy, dep habarlaıdy Almaty-akshamy.kz.
Ekibastuzdaǵy jaǵdaı Úkimet otyrysynda qaraldy. Oblys ákiminiń aıtýynsha, qazir qaladaǵy jaǵdaı áli máz emes. "25 kóp páterli jáne 100-ge jýyq jer úıde jylý joq", - deıdi Ábilqaıyr Ysqaqov.
«Bul úıler jylýdy qabyldaı almaı otyr. Óz kezeginde jylý jelisinde ystyq sý bar. Biraq atalǵan úılerdegi ishki jylý júıesin qalpyna keltirýmiz kerek. Sol úshin basqa qalalardan qosymsha taǵy da 23 brıgada kómekke keldi. Sonymen qatar jylýsyz otyrǵan turǵyndarǵa 1200-ge jýyq jylytý quraldaryn jetkizý uıymdastyryldy», - deıdi Pavlodar oblysynyń ákimi Ábilqaıyr Ysqaqov.
Al Úkimet basshysy osy Ekibastuzdaǵy apattan barlyq ákimder qorytyndy shyǵarýy kerek ekenin aıtty. Ári Energetıka, Indýstrıa jáne ınfraqurylymdyq damý mınıstrlikterine dereý apat sebebin anyqtaýdy jáne eldegi barlyq energetıkalyq nysandarǵa tehnıkalyq aýdıt júrgizýdi tapsyrdy.