Qazirgi ýaqytta Ekibastuz JEO-da 4 qazandyq jumys istep tur
Tabıǵı monopolıalar sýbektileriniń jylý energıasyn óndirý jáne jylý berý qyzmeti tarıfterin belgileý mınıstrliktiń quzyretine jatpaıdy, oǵan tabıǵı monopolıalar sýbektilerin retteý jónindegi memlekettik organdar jaýapty, dep habarlaıdy Almaty-akshamy.kz.
2022 jyly 27 qarashada Ekibastuz JEO-da saǵat 01.30-da jylý jelilerindegi aqaýlarǵa baılanysty jelilik sýdyń qysymy tómendedi, saldarynan №11, 13, 14, 15 sý jylytý qazandyqtary avtomatty túrde isten shyqty, sondaı-aq №8 energetıkalyq qazandyq jumysy da toqtatyldy.
Normasy 400 tonna/saǵat delinse, jylý jelisin sýmen tolyqtyrý shamamen 900 tonna/saǵatty quraǵan.
Jylý jelilerindegi jetkizý temperatýrasy: grafık boıynsha – 87 gradýs, al is júzinde ol 51 gradýsqa deıin tómendep ketken.
Óńirde barlyq tehnıkalyq qyzmetterdiń, energetıkalyq kásiporyndar basshylyǵynyń jáne QR Energetıka mınıstrligi ókilderiniń qatysýymen oblys ákimi bastaǵan jedel shtab quryldy.
«Qazirgi ýaqytta Ekibastuz JEO-da 4 qazandyq jumys istep tur, jylý jelisi aınalymda. Jylý jelilerindegi aqaýlardy joıýǵa jedel brıgadalar jumyldyryldy, oramdyq jelilerde 5 aqaý anyqtaldy, basqa da zaqymdanýlardy anyqtaý jumystary júzege asyrylyp jatyr», - delingen QR Energetıka mınıstrliginiń baspasóz qyzmeti taratqan málimette.
Mınıstrlik buǵan deıin Pavlodar oblysy Ekibastuz qalasy turǵyndarynyń Ekibastuz JEO-da júrgizilip jatqan jóndeý jumystarynyń barysy týraly shaǵymdary boıynsha QR Energetıka mınıstrligi quramynda Atomdyq jáne energetıkalyq qadaǵalaý men baqylaý komıtetiniń jáne ákimdiktiń ókilderi bar arnaıy komısıa qurylǵanyn eske salady.
2022 jylǵy 9-10 tamyz aralyǵynda komısıa Ekibastuz JEO-da boldy. Sapar barysynda negizgi jabdyqtyń jóndeý jumystary jáne tómen temperatýra kezeńinde júktemeni kóterý daıyndyǵy tekserildi.
Stansıany aralaý barysynda JEO basshylyǵyna jóndeý jumystaryn jedeldetý tapsyryldy. Jalpy, elektr stansıasynda 5 energetıkalyq jáne 5 sý jylytý qazandyǵy, sondaı-aq 1 bý týrbınasy ornatylǵan.
«Komısıa jylý qubyrlarynyń tozýynyń joǵary deńgeıin erekshe atap ótti, ol 70%-dan asady. Jylý qubyrlarynyń qazirgi tozýy jylý jelilerindegi, ásirese jylytý maýsymdarynyń basynda jyl saıyn baıqalatyn joǵary apattylyq qaýpiniń negizgi sebebi bolyp tabylady», - delingen habarlamada.
Jylý jelileri qubyrlarynda jóndeý jumystarynyń qajetti jáne jetkilikti kólemin júrgizýge áser etetin negizgi júıeli problemalardyń biri jylý energıasyna qoldanystaǵy tómen tarıf bolyp tabylady. Jylý qubyrlarynyń jalpy uzyndyǵy - 342 shaqyrym, jyl saıyn shamamen 3-4 shaqyrym jylý jelileri aýystyrylady.