Astanada eki satýshydan 100 kelige jýyq nasybaı tárkilendi. Elordada barlyq bes aýdanda nasybaı men veıp ónimderin satý jáne ótkizý faktilerin anyqtaý maqsatynda reıd jumystary júrgizildi.
Astana telearnasynyń málimetine súıensek, polısıa departamentiniń qyzmetkerleri aýdan ákimdikterimen birlesip shegilmeıtin temeki ónimderin satý men taratýdyń 50-ge jýyq faktisin anyqtaǵan, dep habarlaıdy almaty-akshamy.kz.
Bazarda nasybaı satýshy Kúlán Anarbekova tártip saqshylaryna bar jaǵdaıyn aıtyp, túsindirýde. Shóberesiniń naýqas ekenin alǵa tartyp jasyryn satyp otyrǵan taýaryn tastap ketýdi ótindi. Alaıda zań bárine ortaq, ol úlkenniń ótinishi men kóz jasyna qaramaıdy. Jasy 70-ten asqan zeınetkerge zıandy ónimdi tyǵyp satqany úshin 45 000 teńge aıyppul salyndy.
Men Shymkentten, Abaıdan aldyramyn. Ózimiz egemiz ǵoı ony, -deıdi satýshy Kúlán Anarbaeva
Qala turǵyndary arasynda shaıtan bazar atalyp ketken mańda nasybaı satatyndar kóp. Buryn jaıyp satatyn bolsa, qazir tyǵyp beredi. Tipti bazar mańaıynda saýdagerlerge kóterme baǵamen jetkizip beretinder de bar. Elordalyq Bekzat Úsipbekov 4 aıdan beri nasybaı satýmen aınalysady. Ózi ónimdi Shymkent qalasynan aldyrady.
Aıyna bir qap, eki qap aldyramyn. Bastaǵanyma 4 aı boldy. Zań kúshine endi ǵoı, endi toqtatamyz. Qazir anada eki meshok tur. 55-60 kelideı bar, -deıdi qala turǵyny Bekzat Úsipbekov.
Reıd jumystary jabyq bazar ishinde jalǵasty. Tártip saqshylary munda buryn nasybaı satqandardyń sórelerin aqtaryp shyqty. Alaıda eshteńe tabylmady.
Nasybaıǵa tyıym salynǵanyn bilgennen bastap, bazar ishinde satatyndarǵa eskertý jasaldy. Bul ónim sórelerden alyndy. Kúndelikti baqylaý júrgizip otyramyz. Qazir eshkim satyp jatqan joq. Al eger satyp jatqanyn anyqtasaq, ol saýdagermen kelisim shart toqtatylyp, saýda ornyn qaıtaryp alatyn bolamyz,- deıdi bazar ákimshisi Natalá Berıkhanova.
El boıynsha veıp naryǵynda 6000 saýda oryny tirkelgen. Resmı statısıka osylaı deıdi. Al beıresmı satyp jatqandardyń naqty sany joq. Alaıda, endi paıda oılaǵan mundaı satýshylardyń joly túbegeıli kesiledi.
İshki ister mınıstrliginiń málimetinshe, nasybaı- veıp syndy ónimderdi taratýǵa, óndirýge jáne satýǵa tyıym salý kózdelgen. Shegilmeıtin temeki ónimderin zańsyz satatyndarǵa qarsy 18-31 naýryz aralyǵynda reıd júrgiziledi, - dep eskertti «Saryarqa» aýdany polısıa basqarmasy bastyǵynyń orynbasary Dastan Talǵatuly.
Qaladaǵy dúkenderdi aralaý kezinde shegilmeıtin temeki ónimderin satý jáne taratý faktileri anyqtaldy. Olarǵa 92 myń teńgeden astam mólsherde aıyppul kózdelgen.
Almaty aýdanynyń ákimdigi jáne Astana qalasynyń jastar saıasatynyń máseleleriniń basqarmasy jáne qoǵam belsendileri birigip elfbar satatyn, odnorazka satatyn dúkenderge túsindirme jumystary júrgizildi. Almaty aýdanynda 43 osyndaı elfbar satatyn dúken jumys jasap jatyr, - deıdi Qazaqstan stýdentter alánsy respýblıkalyq stýdentten qozǵalysynyń tóraǵasy Ulan Amanǵazyuly Manǵazyuly.
Álem boıynsha 40-tan astam memlekette shegilmeıtin temeki ónimderin satý zańmen shektelgen. Qazaqstan da bul máselege núkte qoımaqshy.