Osylaı atalatyn kórmede 70-ten astam kórkem jáne músindik týyndylar usynylady.
Sýretshi Temir Begimbettiń «Eki álemniń qaqpasy» atty jeke kórmesi, dep habarlaıdy Almaty-akshamy.kz
2024 jylǵy 12 sáýirde saǵat 16:00-de Ábilhan Qasteev atyndaǵy QR Memlekettik óner mýzeıinde Temir Begimbettiń (1951-2022) «Eki álemniń qaqpasy» atty jeke kórmesiniń ashylýy ótedi.
Qazaqstandyq sýretshi Temir Begimbettiń beıneler álemi eki mán – zat pen onyń sımvolynyń toǵysqan shekarasynda týady. Ol jasaǵan árbir jumys óziniń paıdalylyǵymen birge tereń sımvoldyq maǵynany qamtıdy. Sýretshi bizdiń ómirimizdegi barlyq nárse aqylǵa qonymdy jáne úılesimdi rettelgenine senimdi. Temir Begimbettiń jasaǵan týyndylary sheberdiń qol qımylynyń jandy mánerliligin saqtap, onyń sezimtal da yqylasty júreginiń jylýyn jetkizedi. Sýretshi ónerdi baqsylardyń ǵuryptyq bir áreketi dep esepteıdi, onyń maqsaty dene men rýh arasyndaǵy, adam men álem arasyndaǵy úılesimdilikti qalpyna keltirý. Temir Begimbet uqsastyqty izdep ǵasyrlar tereńdigine, túrki halyqtarynyń ejelgi qudaılary Táńir men Umaı rýhtarynyń patshalyǵyna attanady. Sheber úshin Táńir men Umaı qazirgi álemde de tabıǵı energıa men ǵarysh dýalızmin beıneleıtin tiri bolmysty saqtaıdy. Dál osy aspan men jerdiń bıleýshileri sýretshini keskindeme men qoldanbaly jumystardy jasaýǵa jıi shabyttandyratyn.
Temir Begimbet 1951 jyly 12 sáýirde Jambyl oblysynda dúnıege kelgen.1972 jyly Ýkraınanyń Chernovsy qalasyndaǵy qoldanbaly óner joǵary ýchılıshesin «sýretshi-sheber» mamandyǵy boıynsha bitirdi. 1972-1985 jyldary Jambyl qalasynyń «Oblystyq kórkemsýret sheberhanasynda» sýretshi-dızaıner bolyp jumys jasaıdy. 1986-1991 jyldary Almaty qalasyndaǵy «Qazaq qalpyna keltirý mýzeıinde» sýretshi-restavrator bolyp jumys istep,1991-1995 jyldary Semeı qalasyndaǵy «Abaı atyndaǵy ádebı-memorıaldyq mýzeıinde» Uly Abaıdyń kıiz úıin qaıta jasaýmen aınalysty. 1995-2022 jyldary Raıymbek aýylynda (Almaty) kásibı-shyǵarmashylyq jumystarmen aınalysqan bolatyn.
Súıekten oıylǵan oıý-órnek pen kórkem beınelermen bezendirilgen sandyqtar, qoraptar men shkaftar jáne keste men aplıkasıamen bezendirilgen teri men kıizdiń fragmentterinen turatyn qabyrǵa panelderi – bul álemniń erekshe modelderi. Al, tirekter men ǵarysh kartalary, mandalalar men baqsylardyń dabyldary, olardyń kompozısıalary sýretshiniń sanasynan týyndaǵan tereń dúnıeleri. Olarda Temir Begimbettiń makroǵaryshta túsirgen jáne mıkroǵarysh masshtabynda túrlendirilgen erekshe yrǵaǵy bar. Osy týyndylardyń aldynda medıtasıa jasaý, ǵaryshtyq energıamen biriktirý jaqsy, biraq jylqynyń terisi men qoı júniniń kıizin eske túsiretin týǵan topyraqpen baılanysyn joǵaltpaý kerek. Temir Begimbet jasaǵan beıneler – bul sýretshiniń júregi men qıalyndaǵy sıqyrly aǵash butaqtarynyń jemisi.
«Eki álemniń qaqpasy» atty kórmesi ótken men búginnen syr shertetin, jer men kóktiń rýhtary týraly baıandap, adamnyń izdenimpazdyǵy men ózin-ózi tanýyna jol ashady.
Ekspozısıa 2024 jyldyń 5-shi mamyryna deıin jalǵasady.
