Premer-mınıstr Oljas Bektenov tóraǵalyq etetin Sıfrlyq shtab eGov/Aitu jáne Alem.cloud boıynsha mınıstrlikterge tapsyrmalar júktedi, - dep habarlaıdy aqshamnews.kz tilshisi.
Memlekettik organdarǵa kelesi tapsyrmalar berildi:
- Qarjy, Ulttyq ekonomıka, Jasandy ıntellekt jáne sıfrlyq damý mınıstrlikteri jergilikti atqarýshy organdarmen birlesip, "Astana Hub halyqaralyq IT-startaptar tehnoparki" korporatıvtik qoryn óńirlik ınovasıalar jáne kásipkerlik ortalyǵy retinde nyǵaıtý úshin 2025 jylǵy 10 qarashaǵa deıin aqparattyq-kommýnıkasıalyq tehnologıalar salasyndaǵy basym qyzmet túrleriniń tizbesin keńeıtsin.
- Azamattar úshin qolaıly ári qaýipsiz sıfrlyq orta qalyptastyrý maqsatynda memlekettik organdar men olarǵa vedimistik baǵynysty uıymdar jeke mobıldi qosymshalardy ázirleýge tyıym salýy jáne olardyń tek eGov jáne Aitu platformalarynda júzege asyrylýyn qamtamasyz etýi tıis.
- Alem.cloud ulttyq sýperkompúter ortalyǵynda esepteý resýrstaryn bólý qaǵıdalary bekitilsin, sodan keıin tıisti normatıvtik quqyqtyq akt ázirlensin. Ǵylym jáne joǵary bilim mınıstrligi qoldanystaǵy tetikter sheńberinde JOO-larǵa qoldaý kórsetýdi qamtamasyz etsin.
Sıfrlyq shtabtyń sheshimimen memlekettik organdarǵa Astana Hub IT-startaptar tehnoparki qyzmetiniń basym túrleriniń tizbesine mýltımedıa, oıyndardyń dızaınyn jasaý men basyp shyǵarý, baǵdarlamalyq qamtamasyz etýdi engizý, súıemeldeý jáne túrlendirý, kıbersport salasyndaǵy qyzmetter sıaqty tanymal baǵyttardy qosý tapsyryldy. Budan basqa, atalǵan tizbe QR rezıdenti emesterge baǵdarlamalyq qamtýdy paıdalana otyryp, bıznes-prosester aýtsorsıngi, aǵylshyn tilin oqytý sıaqty qyzmettermen tolyqtyryldy. Qyzmetter aıasyn keńeıtý Astana Hub-tyń jahandyq tehnologıalyq qoǵamdastyqty tartý ortalyǵy retindegi ustanymyn kúsheıte túsedi.
Yńǵaıly jáne qaýipsiz sıfrlyq ortany qalyptastyrý maqsatynda barlyq memlekettik mobıldi servıster SuperApp qaǵıdaty boıynsha eGov jáne Aitu ekojúıelerine kezeń-kezeńimen biriktiriletin bolady. Integrasıa mobıldi qosymshalardyń bytyrańqylyq máselesin joıady, úderisterdi jedeldetedi jáne halyqqa memlekettik qyzmetter kórsetý sapasyn arttyrady.
Alem.cloud sýperkompúterlik ortalyǵynyń esepteý resýrstaryn bólý erejelerin bekitý Astana Hub startaptary, ǵylymı uıymdar men ýnıversıtetter, memlekettik organdar jáne olardyń vedimistik baǵynysty uıymdary, sondaı-aq sheteldik kompanıalardy qosa alǵanda, jeke sektor jobalary úshin joǵary ónimdi qýattarǵa qol jetkizýdiń naqty ári aıqyn tetigin qalyptastyrady.
Alem.cloud qýatyn paıdalanýǵa berýdiń basym baǵyttary jasandy ıntellekttiń ulttyq damý mindetterin eskere otyryp anyqtalady jáne bilim berý, densaýlyq saqtaý, aýyl sharýashylyǵy, sýmen jabdyqtaý, memlekettik basqarý, munaı-gaz salasy, taý-ken metalýrgıa kesheni, energetıka, geologıalyq barlaý, kólik jáne logıstıka, ónerkásip, qurylys, robototehnıka jáne taǵy da basqa salalardy qamtıdy.