Gonkong bilim ýnıversıteti (EdUHK) Qazaq ulttyq qyzdar pedagogıkalyq ýnıversıtetimen jáne Abaı atyndaǵy Qazaq ulttyq pedagogıkalyq ýnıversıtetimen yntymaqtastyq týraly kelisimge qol qoıdy. Atalǵan kelisim aıasynda «EdUHK – Qazaqstan bilim akademıasy» quryldy, dep habarlaıdy aqshamnews.kz
QR Ǵylym jáne joǵary bilim mınıstri Saıasat Nurbek akademıanyń qurylýymen quttyqtap, EdUHK-ke Ortalyq Azıa aımaǵyndaǵy bilim berý damýyna qosqan úlesi úshin alǵys aıtty.
Yntymaqtastyq Qazaqstandaǵy ustazdar men muǵalimder úshin joǵary sapaly halyqaralyq damý platformasyn usynady. Sondaı-aq pedagogterdiń kásibı biliktilikterin arttyrýǵa, EdUHK pen Ortalyq Azıa elderi arasyndaǵy bilim jáne tájirıbe almasýdy yntalandyrýǵa baǵyttalǵan.
Kelisimge qol qoıý rásimi EdUHK ýnıversıtetiniń Tai Po kampýsynda ótti. Oǵan QyzPU basqarma tóraǵasy – rektory, doktor Gúlmıra Qanaı, EdUHK prezıdenti, profesor Djon Lı Chı-Kın, Abai university basqarma tóraǵasy – rektory, profesor Bolat Tilep qatysty.
Qol qoıý rásiminde EdUHK prezıdenti profesor Lı birlesip qurylǵan Bilim Akademıasynyń bolashaǵyna senim bildirip, EdUHK-tiń «Bir beldeý, bir jol» bastamasy aıasynda bilim berý salasyndaǵy halyqaralyq yntymaqtastyqty damytýǵa nıetti ekenin aıtty.
Birlesip qurylǵan bilim akademıasy bilim salasyndaǵy jasandy ıntellekt, bilim sapasyn baǵalaý, saladaǵy kóshbasshylyq jáne ınklúzıvti bilim berý máseleleri boıynsha akademıalyq almasýdy damytýǵa yqpal etedi. Ýnıversıtetter sondaı-aq muǵalimderdi daıarlaý, birlesken zertteý jobalary jáne kópmádenıetti almasý salasynda yntymaqtastyq ornatady. Bul seriktestik EdUHK men jibek joly boıyndaǵy Ortalyq Azıa elderimen, sonyń ishinde Tájikstan, Qyrǵyzstan jáne Ózbekstanmen bilim almasý men tájirıbe bólisýdi jetildirýge úles qosady.
